Peqqinnissaqarfik kommunelu Qaanaaq-mi suleqatigiinnissaq pillugu atsioqatigiittut

Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen aamma Borgmester Palle Jeremiassen Avannaata Kommunia, Qaanaami innuttaasunut sullissineq pitsanngorsarniarlugu isumaqatigiissummik atsioqatigipput.

Qaanaami Peqqissaavik Utoqqaat Illuata qanittuaniippoq. Tamatuma kinguneranik atortorissaarutinik sulisunillu ataatsimut atuisoqarsinnaavoq, tamanut iluaqutaaqisumik.

”Pisortat suliffeqarfiutaanni akimut suleqatigiinnissaq pisariaqarluinnarpoq innuttaasut nakorsiallu pitsaanerusumik sullinniarlugit. Taamaattumik nuannaarutigaara peqqinnissaqarfiup aamma Avannaata kommunia suleqatigiinnermik aaqqissuussaasumik  tunngaviliinermik piviusunngortitsimmata” Martha Abelsen oqarpoq.

Ilaatigut periarfissaavoq innuttaasut nakorsiallu misigisassagaat, kommuni peqqinnissaqarfillu ikiorsiissutinik kiisalu sungiusarnissamut atortorissaarutinik assigiinngiiaarnerusunik neqerooruteqarsinnaanissaat. Angorusutaq alla tassaavoq sulisut suleqatinik amerlanerusunik avitseqateqalissapput - ulluinnarni, ullormi piffissani akunnattuni kiisalu pikkorissartoqarnerani.

Sulisussaqarniarneq tunngaviusumik pingaaruteqarpoq, sulisussaqarniarnerlu Qaanaap inuisa amerlassusaat pissutigalugu killeqarpoq. Taamaattumik assersuutigalugu sulisunik aalajangersimasunik katuussilluni atuinerulernissaq ujartorneqassaaq aamma suliassat Peqqinnissaqarfiup Avannaatalu Kommuniata akunnerminni katuullugit suliarisinnaasassavaat.

”Pingaaruteqarpoq innuttaasut sulisuttalu peqqinnissaqarfimmik  suleqatigiilluarsinaanerat misigissallugu, kiisalu sulisut aqutsisullu illoqarfimminni pissutsinik ilisimasaqarluarlutillu paasisimasaqartut tassaasut suleqatigiinnermut sinaakkutissanik aalajangersaasussat Borgmester Palle Jeremiassen oqarpoq

 

Isumaqatigiinneq periarfissiivoq peqqinnissaqarfiup Avannaata kommunia ataatsimoorlutik periarfissanik pilersitsisinnaasut angallassinernik aammalu inuussutissatigut atortussianik.

 

 

 

Sukumiinerusumik paasisaqarusukkuit, Inger Heilman Larsen, tlf. 554160 imaluunniit

Nuka Nathanielsen, tlf. 387608 attavigineqarsinnaapput.