Silap pissusaata allanngoriartornera pillugu ilinniarfiusinnaasoq nutaaq

Qeqertarsuup Tunuata tungaani sikoqartussutsip imallu ataqatigiinnerat kiisalu inuiaqatigiit sumiiffimmi tassani qanittumi immap pisuussutaannik inuusut pillugit ilinniartitsissutigineqarsinnaasumik immikkuullarissumik tunisisinnaavoq. Taamaammat sulissutigineqarpoq inuusuttut nunatsinneersut nunanilu allaneersut silap pissusaata allanngoriartornera pillugu nunat tamat akornanni ilinniarsinnaalernissaat. Ilulissani silap pissusaata allanngoriartornera pillugu kandidatinngorniarfimmik pilersitsinissamut periarfissat sulissutiginissaat Naalakkersuisut akueraat.

Københavns universiteti Ilulissani silap pissusaata allanngoriartornera pillugu ilinniarfimmik periarfissarsiornermi suleqatigaagut. Qeqertarsuup Tunua nunarsuatsinniit eqqumaffigineqarluarpoq tassungalu pissutaavoq nunarsuarmi sikorsuup imaq sukkanerpaamik tassani naapittarmagu. Nalunngilarput silap pissusaata allanngoriartornera inuiaqatigiinnut nunarsuullu sinneranut allannguisorujussuusoq. Allannguutit Issittumi annerpaatut naatsorsuutigineqarpoq, taamaammat silap pissusaata allanngoriartornera siunissami inuiaqatigiinnitsinnut pilersaarutini ilaassaaq.“ Taama oqarpoq Ilinniartitaanermut Naalakkersuisoq, Ane Lone Bagger.

Naalakkersuisoq Ane Lone Bagger Avannaata Kommuniani, borgmesteri Palle Jeremiassen Ilulissani silap pissusaata allanngoriartornera pillugu ilinniarfiusinnaasumut periarfissat pillugit oqaloqatiginikuuaa.

“Naatsorsuutigaara ilinniagaq taamaattoq ilinniartut inuiaqatigiinnut imaluunniit inuiaqatigiilerinermi tunngasutigut bachelorinngorniarnermini pinngortitalerinikkut ilassutaasinnaasoq, tamannalu pilersaarusiornermut ingerlatsinermullu sulinermi annertuumik aallaaveqartitsisinnaavoq. Taamaammat nuannaarutigaara, Avannaata Kommuniani borgmesteri Naalakkersuisut suleqatigiumammagit, tamanna pillugu Ilulissani ilinniartitaanermut suliniutinut taamaalilluta ineriartortitseqataasinnaagatta. Aamma Takornariaqarnermut, ilinniartitsisunngorniarnermut aamma ilinniakkanut allanut silap pissusaata allanngoriartornera pillugu pikkorissartitsinerit periarfissaqartitsissasut takusinnaavara ”, Ilinniartitaanermut Naalakkersuisoq Ane Lone Bagger naggasiivoq.

 

 

 

Paasissutissat allat pillugit una attavigiuk: Carl Egede Bøggild, Immikkut siunnersorti, Ilinniartitaanermut, Kultureqarnermut Ilageeqarnermullu Naalakkersuisoqarfik uani cegb@nanoq.gl