Killiliisa pillugu ukiumoortumik nalunaarusiap 2019-ip saqqummersinneqarnera: Kinguaassiutitigut atornerluisarneq akiorniarlugu suliniut pitsanngorsaaffigineqarsimavoq

Kinguaassiutitigut atornerluisarneq akiorniarlugu suliniut ukiuni kingullerni pitsanngorsaaffigineqarsimavoq. Taamaalilluni 2019-imi suliniutit aalajangersimaqqissaartut, kinguaassiutitigut atornerluisarnermik pinaveersaartitsiniarnermik akiuiniarnermillu suliamut tapersiissut ineriartortinneqarsimapput aallartinneqarlutillu. Ilaatigut suliamut attuumassutilinnut atuakkamik najoqqutassamik, atugarliornerit aallaaviinik paasiniaasarnerup ajornartorsiutinillu sulissuteqartarnerup pitsanngorsarnissaanik siunertalik saqqummersinneqarsimavoq. Tamatuma saniatigut filmi piviusulersaarut "Pilluarneq ersigiunnaarpara" 2019-imi novemberimi saqqummersinneqarpoq. Kinguaassiutitigut atornerlunneqarnerup kingunerluutaanik inuunermi atugaqarneq misigisimasallu sakkortugaluartut qanoq ingerlariaqqittoqarsinnaanersoq filmimi piviusulersaarummi takutinneqarput.

 

Naalakkersuisoq Martha Abelsen ima oqarpoq: ”Killiliisami suliniutit kinguaassiutitigut atornerluisarnermik ataatsimoorluta akiuiniarnitsinnut pingaaruteqarluinnartumik allanngueqataanerat tulluusimaarutigaara. Inuiaqatigiinnitsinni meeqqat taamatuttaarlu inersimasut toqqissisimanartunik atugassaqartinneqarnissaannut suleqatigiilluta ataatsimoorlutalu akisussaaffimmik tigusinerput nuannaarutigaara. Suleqatigiinnerup pilersinneqarsimasup ingerlalluaannarnissaa uannut pingaaruteqarluinnarpoq, tamanna kinguaassiutitigut atornerluisarnerit ikilisinnissaannut tunngaviummat”.

 

Killiliisami suliniutip ilaattut inuit kinguaassiutimikkut atornerlunneqarsimasut imaluunniit kinguaassiutikkut atornerlunneqarsimasumut qanigisaasut katersorneqarsimapput. Inuit taakkua Killiliisami maligassiuisutut taaneqarput. Maligassiuisut 2019-imi saqqummiisarnermik, innuttaasunik ataatsimiisitsisarnermik atortussanillu inerisaaqataanermik suliatik ingerlateqqissimavaat. Maligassiuisunik suliniut nunami sumiiffinni arlalinni inuiaqatigiit najukkami suliniutinik aallartitsinerannik kinguneqarsimavoq. Paasititsiniaanermik suliniutit sammisamut assigiinngitsutigut paquminartuiaaqataasimapput kinguaassiutitigullu atornerluisarnerit kingunerilu pinaveersaartinniarnerinik suleqatigiinnermik tamatumalu oqallisaanerulerneranik kinguneqarsimapput.

 

2019-imi suliniutinik aallartinneqartunik sulilluarneq ingerlaqqippoq. Soorluttaaq 2020-mi suliniutit aalajangersimasut nutaat arlallit inerisarneqarnerat ingerlateqqinneqartoq. Tassunga ilanngullugit ilaatigut inunnut kannguttaatsuliortartunut suliniutit neqeroorutillu.

 

Naalakkersuisut Killiliisa pillugu ukiumoortumik nalunaarusiaq – Naalakkersuisut kinguaassiutitigut atornerluineq akiorniarlugu periusissiaat 2018-2022 – saqqummiuppaat. Suliniutit suliallu 2019-ip ingerlanerani aallartinneqarsimasut ukiumoortumik nalunaarusiami tunngavigineqarput. Ukiumoortumik nalunaarusiaq uani atuarsinnaavat:

 

https://naalakkersuisut.gl/~/media/Nanoq/Files/Publications/Familie%20og%20Justits/GL/Killiliisa%20Arsrapport%202019%20KA%20web.pdf