ATV-nut maleruagassat, Kalaallit Nunaanni pissutsinut naleqqussakkat pillugit Naalakkersuisut Assartuussinermut Ministereqarfik suleqatigaat

Aaja Chemnitz Larsen ATV-nik ingerlatsisinnaanermut allagartat pillugit assartuussinermut ministerimut apeqquteqaateqarpoq. Apeqqut taanna pillugu suli Naalakkersuisut Assartuussinermut Ministereqarfimmik oqaloqatiginnipput.

 

Ineqarnermut Attaveqaqatigiinnermullu Naalakkersuisup Karl Frederik Danielsen-ip kingullermik 5. december 2019-imi angallannermut inatsit ATV-llu pillugit danskit assartuussinermut ministeriat Benny Engelbrecht kiisalu taassuma siuliani assartuussinermut ministeriusimasoq Ole Birk Olesen 25. Februar 2019-imi oqalliseqatigai.

 

Karl Frederik Danielsen oqarpoq:

 

”Angallannermut inatsisip Kalaallit Nunaanni pissutsinut naleqqussarneqarnissaa uannut pingaaruteqarpoq. Taamaattumik aamma ATV-nut traktorit inuillu biilii pillugit maleruagassat aallaavigiunnaarlugit, ATV-t angallannermut inatsimmut ilanngunneqarnissaat uannut pingaaruteqarpoq.

 

Tamatuma peqatigisaanik inatsimmik, ajornartorsiutinik nutaanik pilersitsiviusumik suliaqartuunnginnissarput pingaaruteqarpoq. Tassani nunaqarfinni innuttaasut angallanneqarnissamut pisariaqartitsineri kisimik eqqarsaatigineqassanngillat. Aamma angallannermi – nunaqarfinni illoqarfinnilu isumannaassusissaq eqqarsaatigineqassaaq. ATV-t nunaqarfinni assartuutaannaanngillat, kisiannili aamma illoqarfinni nuannaariinnarlugu angallatitut atorneqartarlutik. Maleruagassat pisunut tamanut atorneqarsinnaasussaapput. Taamaattumik eqqarsaqqaarpugut.”

 

ATV-nut maleruagassat pillugit apeqqut angallanneq pillugu suliassaqarfimmi attaveqarfittut ataatsimiititaliap, suliassaqarfimmi ajornartorsiutinik siammasinnerusunik suliaqartup suliassaanut ilaavoq.

 

Attaveqarfittut ataatsimiititaliaq kalaallit danskillu oqartussaasuinit ilaasortaaffigineqarpoq.

 

Annertunerusumik paasisaqarusunnermi Ineqarnermut Attaveqaqatigiinnermullu Naalakkersuisoqarfik box909@nanoq.gl aqqutigalugu attaveqarfigineqassaaq.