Isumaqatigiissut Kalaallit Nunaanni imartat avatangiisaanni upalungaarsimanermi nukittunerulersippaa

Illersornissaqarfiup aamma Namminersorlutik Oqartussat akornanni isumaqatigiissut Kalaallit Nunaanni imartat avatangiisaanni upalungaarsimanermi nukittunerulersippaa

Kalaallit Nunaata aamma Danmarkip ilaatigut mingutsitsinermut akiuiniarnermut atortutigut aammalu Illersornissaqarfimmit immikkut ilisimasatigut tapersersoqatigiissinnaanissaat, isumaqatigiissummi nutaami qulakkeerneqarpoq

Danskit aamma kalaallit oqartussaasuisa akornanni qaninnerusumik suleqatigiinnissaq pillugu isumaqatigiissuteqarnermi, Kalaallit Nunaata eqqaani imartat avatangiisaat asseqanngitsut maannakkut pitsaanerusumik illersorneqarnissaat qulakkeerneqarpoq.


Isumaqatigiissutip kingunerisaanik mingutsitsinermik akiuiniarnermut isumalluutinik ataatsimoorussanik, Illersornissaqarfimmi pigineqartunik aammalu Namminersorlutik Oqartussanit pigineqartoq ingerlatseqatigiiffik Greenland Oil Spill Response A/S aqqutigalugu Namminersorlutik Oqartussat pigisaannik atuinissaq suleqatigiissutigineqassasut.

Illersornissamut ministeri Trine Bramsen oqarpoq:

“Imartat avatangiisaat illersorneqarnissaat pingaaruteqartorujussuuvoq. Minnerunngitsumik Kalaallit Nunaanni pinngortitaq asseqanngitsoq pineqartillugu. Pinngortitaq pitsaasuutillugu qimannissaata qulakkeernissaa akisussaaffigaarput. Matumani isumaqatigiissuteqarnermi Kalaallit Nunaata aamma Danmarkip akornanni qaninnerusumik suleqatigiinnerup naleqartinneqarnera takutinneqarpoq. Ataatsimoorluta ilisimasatsinnik isumalluutitsinnillu atuinitsigut angusassagut annertunerussapput”.
Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoq, Jess Svane, oqarpoq:

”Illersornissaqarfiup aamma Namminersorlutik Oqartussat akornanni nutaamik suleqatigiinnissamut isumaqatigiissuteqarneq naammagisimaartorujussuuara. Isumaqatigiissutip kingunerisaanik atortut pisinnaasallu Greenland Oil Spill Response A/S-imi pigineqartut ataatsimoorluta iluaqutissatsinnik pitsaasumik atorneqartussanngorput. Imartat avatangiisaat aamma pinngortitamik illersuineq Naalakkersuisut pingaarnersiuinerminni salliutittuaannarpaat.”

Suliaqarnermi pineqarpoq mingutsitsinermik akiuiniarnermut atortunut, ataatsimoorluni uninngasuuteqarnissamut, siunnersuinermut, sungiusarnernut ilaalu ilanngullugit imminnut periarfisseeqatigiittoqassasoq. Assersuutigalugu Illersornissaqarfiup Greenland Oil Spill Response-mi Kalaallit Nunaata imartaanni uuliamik mingutsitsinermut akiuiniarnissamut atortuni toqqorsivimmiitissavai, aammalu Namminersorlutik Oqartussat Illersornissaqarfiup immikkoortortaannik immikkullu ilisimasaannik atuisinnaassapput.

Suleqatigiinnissamut isumaqatigiissuteqarnermi Kalaallit Nunaata aamma Danmarkip akornanni akisussaaffiit agguagaanerat allanngortinneqanngilaq, kisianni Kalaallit Nunaata eqqaani imartat avatangiisaasa sapinngisamik pitsaanerpaamik paarilluarnissaannik ataatsimoorluni kissaateqarnermut takussutissaalluni.

Annertunerusumik paasissutissanik perusukkaanni Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfimmut saaffiginnittoqarsinnaavoq: pisortaq Isak Nielsen Kleist oqa. +299 345000, email: isiin@nanoq.gl