1. juni 2020-miit sapaatit akunnerannut pingasoriarluni Imarpik qulaallugu timmisartuussisarnissaq

1. juni 2020-miit Kastrupip Mittarfiata aamma Kangerlussuup akornanni sapaatit akunnerannut pingasoriarluni Imarpik qulaallugu timmisartuussisoqartalernissaa pillugu Namminersorlutik Oqartussat Air Greenlandimut isumaqatigiissuteqarput

Danmarkip aamma Kalaallit Nunaata akornanni timmisartuussisoqartalernissaa qulakkeerniarlugu Namminersorlutik Oqartussat Air Greenlandimut isumaqatigiissuteqarput. Isumaqatigiissut aqqutigalugu Danmarkip aamma Kalaallit Nunaata akornanni sapaatit akunnerannut pingasoriarluni timmisartuussisoqartalernissaa qulakkeerneqarpoq.

Isumaqatigiissuteqarnermut atatillugu Namminersorlutik Oqartussat periarfissaq iluatsillugu, innuttaasut amerlasuut maannarpiaq bilitsinut akikinnernut pisiarineqareersunut atatillugu nalornissuteqarnerat kipiluttunartorsiornerallu pillugu Air Greenland oqaloqatigaat.

Ineqarnermut Attaveqaqatigiinnermullu Naalakkersuisoq Karl Frederik Danielsen oqarpoq:

"Bilitsinut assigiinngitsunut piumasaqaatit niuernermik tunngasunik, taamaallaat Air Greenlandimit susassaqarfigineqartunik tunngaveqarput. Air Greenlandip inatsisit malittarisassallu, suliassaqarfimmut atuuttut malitaraat.

Kisiannili soorunami apeqqut taanna oqaluuseraarput, Imarpik qulaallugu timmisartuussinernut bilitsinik akikinnernik utertitsisinnaaneq, maannarpiaq COVID-19-ip atuunnerani pissutsit allaalluinnartut atuunneri peqqutigalugit innuttaasunit amerlasuunit soqutigineqarmat.

Innuttaasut amerlasuut nunarsuarmi pissutsit pillugit nalornissuteqarmata, tamanna uanga Air Greenlandillu paasilluarparput.

Nuannaarutigalugu ilisimatitsissutiginiarpara, Air Greenland maanna innuttaasunik, Imarpik qulaallugu bilitsinik akikinnernik pisisimasunik, angalanissamut periarfissaqanngitsunik imaluunniit maannarpiaq angalanissaminnik kissaateqanngitsunik naaperiaanissamut periarfissanik misissuilermat.

Air Greenland ilisimatitsivoq, Imarpik qulaallugu bilitsinik akikinnernik maajip ulluisa 22-anni nal. 8.00-imiit allannguisoqarsinnaalissammat – Atortut peqqutaallutik allannguinissaq siusinnerusukkut pisinnaanngilaq.

Isumaqatigiissut, Air Greenlandimut isumaqatigiissutigisarput aamma aningaasatigut kingunerisassanik, Air Greenlandip bilitsit ilaannut piumasaqaatinik allannguinermini eqqorneqaatissaanik annikillititsisussaavoq.

Air Greenland nammineerluni pissutsit taakku pillugit paasissutissanik amerlanerusunik nassiussiniarpoq."

Sapaatit akunnerannut pingasoriarluni Imarpik qulaallugu timmisartuussisarnissamut isumaqatigiissut 1. juni 2020 atuutilissaaq, maannamuugallartorlu 15. juli 2020-p tungaanut atuutissalluni. Tamatuma kingorna isumaqatigiissut sivitsorneqarsinnaavoq.

Annertunerusumik paasisaqarusunnermi inussiarnersumik Air Greenland attaveqarfigeqquneqarpoq.