Isummernissamut kiffaanngissuseqarpugit – isummernissarli pisussaaffiginngilarput

Aallaqqaammut hashimik anngiortumik eqqussuinissaq pinaveersimatinniarlugu ilanngaaserisunik amerlanerusunik kissaateqarput. Tulliullugu akileraarusigaanngitsumik akiliunneqarluni sulinngiffeqarluni angalanernik atuinerup annertunerulersinneqarnissaat illersorpaat. Maannalu Coronap siaruaassuunnerata nalaani takornariaqartitsinermik inuussutissarsiutillit siuarsarniarlugit Namminersorlutik Oqartussat ikiorsiissuteqarnissamik saqqummiussinissaannut siunnersuummik saqqummiussipput.

Siunnersuutit siuliani taaneqartut borgmesterinit tallimaneersuupput, ilaatigullu aningaasartuuteqarfiunissaat siunnersuutit assigiissutigaat. Ilaatigut aamma siunnersuutit qanoq aningaasalersorneqarumaarnissaannut siunnersuummik ilanngussisoqanngilaq. Naggataagulli suliassanut kommunit susassaqarfigisaannut attuumassuteqangaanngillat.

Suut qanoq pitsaanerusumik ingerlanneqarsinnaanerannut isummat nutaat sukkulluunniit saqqummiunneqarnissaat tikilluaqqusarpavut, siunnersuutilli nutaat aningaasartuuteqarfiusussat qanoq aningaasalersorneqarnissaannut siunnersuummik ilaqartinneqanngikkangasa maanna Coronap nalliusimaarnerani siunnersuutitsialappassuarnut siunertagissaartunut aningaasanik nassaarniarneq ajornakusoortorujussuuvoq. 2020-mut 2021-mullu aningaasanut inatsit annertoorujussuarnik amigartoorfiussasut naatsorsuutigineqarpoq, taamaammallu Naalakkersuisut aningaasartuutikillisaaneq qanorlu ililluni nunatta isertitaasa qaffariartinneqarnissaannut aqqutissat nassaarinissaat soqutigineruaat.

Tamannarpiarlu patsisigalugu 2020 tamakkerlugu nutaanik siunnersuutinik pisariaqavissuunngitsunik aningaasartuuteqarfiusussanik tapersiinnginnissaq Naalakkersuisut tunngaviusumik aalajangiupparput. Pisariaqavissut tassaasinnaapput siunnersuutit piffinni piffinni suliffissaaleqiffiusuni amerlanerusunik pisariaqartunik suliffissaqalersitsisut.

Borgmesterit kisimik siunnersuutinik aningaasartuuteqarfiusussanik nassaarniallaqqinngillat. Kattufiit ingerlatsisullu suliniutinut nutaanut aamma kiissaatiminnik saqqummiussuipput, uangalu pisariaqavissumik manna tamatigut akissutigisariaqarpara: Siunnersuutit qimerloorusuppakka, aningaasalersornissaannuli qanoq eqqarsarpisi?

Akissullu taanna tusagassiortunut akuttunngitsumik arlaat suinnersuummik aningaasartuuteqarfiusussamik saqqummiussiniaraangat uanga qanoq isumaqarninnik aperikkajuttunut aamma akissutigissavara. Tamanna apersorneqarusunnginnittut paasineqassanngilaq. Taamaaliorusuttuaannarpunga, taamaallaalli aningaasartuutit qaffasinnerulernissaannut isummersorfissanut, aningaasalersuutissallu nanineqarnissaat uannut suliassanngortinneqartunut apersorneqarnissara siunnertaqarsorinngilara. Imaluunniit tunngaviusumik suliaq Naalakkersuisup allap akisussaaffigippagu.

Siunnersuutit tamarmik uannit oqaaseqarfigineqanngikkaluartut, taamaattoq Coronap tunillaassuunnerata nassatarisaanik suliniutit passunneqarnissaannik pisariaqartitanut siunnersuuteqartut Naalakkersuisunit isumaqatigineqannginnerattut tamanna paasineqassanngilaq. Maanna unammillernartitanut annertuunit sapinngisamik annikinnerpaamik kingunerluuteqartumik aniguinissarput siunertaralugu Naalakkersuisut ilungersorlutik sullipput.


Annertunerusumik paasisaqarusunnermi attavissaq: Martin Christiansen, (Finansdepartementet) Toqq. +299 345651, MCHR@nanoq.gl