Naalakkersuisut Isumaqatigiissutinut Isumalioqatigiissitap siulittaasua toqqarpaat

Naalakkersuisut Martha Labansen Isumaqatigiissutinut Isumalioqatigiissitamut pilersinneqaqqammertumut siulittaasutut toqqarpaat. 7. maj 2020-mi Naalakkersuisut ataatsimiillutik toqqaapput.

“Isumaqatigiissutinut Isumalioqatigiissitaq Martha Labansen siulittaasoralugu misilittagalimmik, isumaqatiginninniallaqqissumik kikkullu tamarmik akuerisinnaasaannik isumaqatiginninniartartumik siulittaasortaarpoq”, Vittus Qujaukitsoq, Aningaasaqarnermut Naalakkersuisoq, tulluusimaarluni oqaaseqarpoq, ilisimatitsillunilu, Isumaqatigiissutinut Isumalioqatigiissitap isumaqatigiissutit amerlasuut ikilisarnissaannut, isumaqatigiissutinut aaqqissuussinermik, nunatta immikkuullarissumik pissusianut pisariaqartitaanullu tulluuttumik aaqqissuussinissamut siunertaqartoq.

Martha Labansen siulittaasuunissamut qilanaarpoq. Oqaaseqarlunilu:
“Isumaqatigiissutinut aaqqissuussarput ilitsoqqussanit aamma pilersitsinikkullu inerneruvoq. Taamaammat isumaqatigiissuteqarfik misissoqqissaarneqarnissaa, naleqqunnerutinniarlugu pingaarpoq. Suliassaq, isumalioqatigiissitap ilaasortaasussat suleqatigalugit aallartinnissaanut qilanaaraara.”

Siulittaasunngoqqammertoq socialrådgiveritut ilinniarnikuuvoq, 1999-2013-imilu kommuninut kattuffikumut, KANUKOKA, pisortaasimalluni. Saniatigullu 2009-mi kommuninik katititsinermi isumaliutissiissummut annertuumut pilersitsisut annerpaat ilaanniilluni. Aaqqissuussaanermut Isumalioqatigiissitami siulittaasuusimavoq.

Juni aallartinnerani ilimagineqarpoq Isumaqatigiissutinut Isumalioqatigiissitami siullermik ataatsimiittoqassaaq.

Annertunerusumik paasisaqarusunnermi attavissaq: Rikke Frederiksen, (Isumaqatigiissutinut Isumalioqatigiissitap allattoqarfia) Toqq. +299 345119, RIFR@nanoq.gl