Aallaqqusinnginnerit atorunnaarsinneqarput – tunillaassortoqannginnissaanulli periuserineqartoq suli malinneqassaaq

Nutarterpoq 7. maj

Kalaallit Nunaannit angalanissat peqqinnissaq eqqarsaatigalugu aarlerinartoqarunnaarmata Kalaallit Nunaata Danmarkillu akornanni upalungaarsimanermi immikkut timmisartuusisarnerit ataasinngornermi 4.maj aallarnerfigalugu atorunnaarsinneqarput.

Ataasinngorneq ulloq 4. maj

Taamaasillutik suliffeqarfiit innuttaasullu Kalaallit Nunaannit Danmarkimut angalaniartut Air Greenlandip nittartagaa aqqutigalugu 4. maj aallarnerfigalugu angalanissaminnik inniminniisinnaalerput. Taamaattorli angalasut Kalaallit Nunaannukartut misissuiffigineqartarneri attatiinnarneqassapput. Tassa imaappoq tikittussat pisariaqavissumik angalanersut suli naliliiffigineqartassapput. Taamaasillutik nunatsinnit aallartut uternissaminnut imaasiallaannarlutik bilitsisisinnaasanngillat.

”Kalaallit Nunaanukartut suli misissuiffigineqartarnerisa inunnit nunatsinnit aallartunit eqqaamaneqarnissaa pingaaruteqartorujussuuvoq. Nunatsinnit aallartut ataasiakkaat aallaaviatigut eqqaamasariaqarpaat qularnanngitsumik maji naallugu pissutsillu ajorseqqissappata immaqa sivisunermik Kalaallit Nunaanut utersinnaanissaq periarfissaasanngimmat.” taamak oqarpoq Hans-Peder Barlach Christensen Strategisk Corona Stab-imi nangillunilu:

”Kalaallit Nunaanni corona-mik tunillatsissimasuerunnikkuuvoq, taamaasillutalu nunarsuup sinnerani suli coronamik nappaalasoqarnera aammalu nappaatip uteqqissinnaanera immaqa puigorsinnaasarlutigu. Tunillaassortoqannginnissaanut periuserineqartoq Kalaallit Nunaanni suli atorneqassaaq, taamaasiornikkut Kalaallit Nunaanni annertuumik tunillaassuuttoqarsinnaanera tamanna aqqutigaluguttaaq pinaveersaartinneqarsinnaammat. Tamatuma kingunerisaanik inuussutissarsiuteqartut, pisortat paaqqinnittarfii assartuutillu suli killilersuiffigineqarput. Inuit 100-nit amerlanerusut katersuuttannginnissaat kaammattuutigaarput inuillu pissusilersortarneri eqqarsaatigalugit kaammattuutigut suli amerlaneralutik. Pissutsit taamaannerisa attatiinnarnissaat pingaaruteqarluinnarpoq.”

Kalaallinit Danmarkimi ilinniagaqartunit angerlarsinnaanissamut periarfissat pillugit saaffiginnissutit arlaqarput. Ilinniakkanut suli aaqqiiffigineqarsimanngitsunut tunngatillugu danskit naalakkersuisui kingusinnerpaamik 10. maj atuarnerit naammassineqarnissaanut tunngasunik nalunaaruteqartussaapput. Taamatut nalunaaruteqartoqarniartorlu kalaallit ilinniagaqartut angerlarsinnaanissaanut piareersarnerit aallartinneqarsinnaalissapput.

Tunillaassortoqannginnissaanut periuserineqartoq
Tunillaassortoqannginnissaanut periuserineqartumi ilaatigut makku ilaapput:
  • Allanut qanillinaveersaarit, assaat eqqiluitsuutinnissaat quersortarnitillu nakkutigikkit
  • Coronavirus-imik tunillatsissimasut tamakkiisumik misissorneqarlutillu mattusimaneqartarneri
  • Tunillatsissimasut attaviginerisigut tunillanneqarsimasunik paasiniaasarneq angerlarsimaannartitsisarnerlu
  • Nappaammik eqqussisoqarsinnaanera minnerpaaffianiitsinniarlugu Danmarkimit Kalaallit Nunaanut akuerineqaqqaarluni taamaallaat angalasoqarsinnaavoq.
  • Kalaallit Nunaannukarniartut Sumut-immersugassaq immersortassavaat tikinnermilu takutillugu
  • Angalasut Danmarkimit aallannginnerminni COVID-19-imik tunillatsissimanersut misissorneqartarnissartik aammalu Kalaallit Nunaannut tikereernerup kingorna ullut tallimassaani misissorneqartarnissartik ammaffigisariaqassavaat.
  • Nunatsinnut apuuttut ulluni 14-ini angerlarsimaannartussaatitaapput.