1. maj immikkut illuinnartoq

Aningaasaqarnermut Aatsitassanullu Naalakkersuisup Vittus Qujaukitsup oqalugiaataa:

Asasakka sulisartut,

 

Nunarsuarmi sulisartut ulluanni tamassi pilluaritsi. Sulisartut ulluat immikkut illuinnartumik nalliussivarput, tassami nualluussuup COVID-19-ip malitsigisaanik nunarput sorpassuartigut mattussaaqqammat. Taamaattumik naapinnata oqalugiaatiga immiussaq ilissinnut apuutissavara.

 

Tassunga peqqutaavoq sulisartut ullorsiornerat ajornartoornermi aamma eqqugaammat, tassami inuit 100-it tikillugit kisimi katersuuttoqarsinnaanera pisortaniit piumasaqaataammat.

 

Nualluussuup COVID-19-ip siaruannginnissaa qulakkeerniarlugu Naalakkersuisut assigiinngitsutigut peqqussutinik najoqqutassiorput, tamannalu ataatsimik kisimi siunertaqarpoq: tassalu nualluussuarmik eqqugaannginnissarput.

 

Nunarsuup sinnera qiviarutsigu nunat tamangajavimmik matoqqapput, taamaasilluni angalaneq sunaluunniit uniiveqqavoq. Tamanna aamma aningaasarsiornikkut unittoornermik kinguneqarpoq, taassumalu malitsigisaanik suliffissaaleqisut amerleriarlutik.

 

Qujanartumik nunarput – Nunarsuarmi qeqertat annersaat – eqqugaaqqagaluarluni, taamaattoq aamma sananeqaatimigut inuttaminik illersuutaavoq. Tassami angallanneq mattunneqarmat nualluutip siaruarnissaa periarfissaarutsinneqarpoq.

 

Inuppassuit ilaqutariillu angerlarsimatinneqarput, aammalu suliffeqarfiit amerlasuut tamakkiisumik ilaannakortumilluunniit matoqqatinneqarlutik.

 

Sapaatip akunneri kingulliit arfinillit tamatsinnut imaannaanngillat, tassami aatsaat taamatut pisoqarpoq.

 

Aningaasarsiornerup unikaallannera qanoq sivisutigissanersoq apeqqutaalluinnarpoq qaqugu angallanneq tamakkiisumik ammaateqqinneqassanersoq, taamatullu inuit katersuussinnaanerat nalinginnaasumik ingerlalissanersoq. Ataaseq kisimi aalajangiisuuvoq, tassalu nualluutip COVID-19-ip siaruaakkiartorunnaarnissaa.

 

Neriuutiginarpoq nualluummut akiuussutissamik nassaartoqarnissaa, tamannalu anguniarlugu nunarpassuit nakorsaat akiuussutissamik nassaarniarlutik ulappupput.

 

Naalakkersuisuniit neriuutigaarput pissutsit ilorraap tungaanut saakkumaartut, taamaasillutik suliffeqarfiit nalinginnaasumik ingerlalerpata sulisartut sulilerniassammata. Aasariartulernerani neriuutissavut alliartorput, naak nualluutip siaruaqqilersinnaanera aarlerinaateqaraluartoq. Taamaattoq neriuuteqarnissarput pisariaqarpoq.

 

Ullut ilungersunartut atukkavut misiliutaapput inuiattut ataatsimoorsinnaanitsinnut. Nunatta qanorluunniit ilungersunartigisumik atugaqaraluarnerani inuisa ataatsimoornissaat pingaaruteqarpoq, taannami kisiat aqqutigalugu immitsinnut tapersersoqatigiissinnaavugut, kaammattoqatigiilluta nukittorsaqatigiillutalu.

 

Qeqertarmiuunerput ulluinnarni eqqarsaatigisanngikkaluarlugu pisut ersersippaat qanoq inuiaqatigiittut aaqqissugaanitsinni pitsaatigisumik inissisimalluta. Nunarpassuarni allani nualluut toqqutaalluni atugaavoq. Tamanna pisoq alianarpoq.

 

Nunatsinni nualluutip ukioru atugaapilutsigissanersoq ilisimanngilarput. Ataaserli neriuutigaara, tassalu peqqilluta tamavitta aniguissasugut.

 

Naalakkersuisut sulisartut suliffeqarnissaat qulakkeerniarlugu ersarissumik politikkeqarput, aamma ukiuni siuliini suliffissaaleqinerup akiorniarlugu sulineq iluatsilluartutut oqaatigisariaqarpoq. Tassani inuussutissarsiutit ilinniartitaanikkut piginnaanngorsaaqqinnikkullu iliuuseqarfigineqarnerat, taamatullu nunap immikkoortui pisariaqartitaannik aallaaveqartumik suliniuteqarneq suliffissaaleqinerup milliallanneranik kinguneqarpoq. Soorunami sanaartugassat siammarternerat, aalisagartassat amerlinerat, pisuussutinik atuinermi akitsuutinik eqqussineq, sulilersitsiniaalluni periutsit, ilinniartitaanikkut piginnaanngorsaaneq il.il. pissutsit iluatsinnerannut peqqutaapput.

 

Aningaasarsiornikkut politikki iluatsissappat inuussutissarsiornikkut politikki ersarissoq atuuttariaqarpoq. Tassungalu atatillugu oqaatigissavara Naalakkersuisuniit suliniutitta timitalerneqarnissaat anguniarlugu sulinerput nangissaaq, COVID-19 apeqqutaatinnagu.

 

Soorunami COVID-19-ip atuunnera sunut tamanut kalluivoq, kisianni aqulissanngilaatigut ineriartornissarput unitsillugu.

 

Tassuunakkut sulisartut naammagittarlutik pissutsit ajornerulinnginnaassaat qulakkeerniarlugu pisortat kaammattuutaannik malinninnerannik qutsavigerusuppakka.

 

Nualluussuup COVID-19-ip ajornartoorfiginera atugaalermat Naalakkersuisut sukkasuumik iliuuseqarput innuttaasut illersorniarlugit. Angallanneq killilersorneqarpoq, inuit katersuussinnaanerat killilerneqarpoq, suliffeqarfiit suut matussanersut aalajangerneqarpoq il.il. Tamakku tamarmik innuttaasut illersorniarlugit iliuuserineqarpoq, tassanilu upalungaarsimanermut sulisut tamarmik qutsavigerusuppakka.

 

Ilanngullugu Naalakkersuisut suliffeqarfinnut ikiorsiissuteqarput, taamaasillutik suliffeqarfiit akiliisinnaajunnaarlutik unittuunnginniassammata. Sulisartut angerlartiinnarneqartut ikiorserneqarput. Suliffeqarfiit akileraarutitigut akitsuutitigullu akiliuteqarnissaannut piffissaliussat sivitsorneqarput. Akiliisitsiniartarnermi aamma periutsit qasukkarneqarlutik.

 

Taassuma ingiallortaanik peqqinnissakkut najoqqutassat nualluussuup COVID-19-ip siaruannginnissaanut illersuutit assigiinngitsorpassuit atuutilerput, aammalu pisup qaangiunnissaata tungaanut illersuutaassallutik.

 

Iliuuserpassuit tamakku neriuppunga inuiaqatigiittut ingerlatat unittuunnginnerannik qulakkeerinnissasut.

 

Aasap kingorna susoqassanersoq siulittuutigineqarsinnaanngilaq, kisianni sillimaffissat pisariaqalissappata sinaakkusersorumaarpavut. Ilaatigut ikiorsiissutit sivitsorneqassanersut misissorparput, taamatullu aningaasanut inatsit 2020-imut atuuttoq nutaamik nalilersuiffigineqarluni. Allatut pingaarnersiuisoqarnissaa pisariaqalissappat tamanna piumaarpoq, tassanilu Inatsisartut aalajangiiumaarput.

 

Tamassi ullorsiorluarnissassinnik kissaappassi.

Oqalugiaat pillugu attaveqarfigineqarsinnaasoq tassaavoq Aningaasaqarnermut Naalakkersuisoqarfimmi attaveqaqatigiinnermut tunngasunut siunnersorti Martin Christiansen attavigineqarsinnaavoq, oqarasuaatikkut 345651-imut sianerfigalugu, imaluunniit e-mailikkut allaffigalugu:  MCHR@nanoq.gl