Tasiilami qernertanik qilalugartassiissutit tamakkerneqarput

Aalisarnermut, Piniarnermut Nunalerinermullu Naalakkersuisoqarfiup (APNN) Aqutsiveqarfik Tasiilaq-miit qilalukkanik qernertanik pisarineqarsimasunit nalunaarutinik aqqaneq marlunnik tigusaqarsimavoq. Tamanna isumaqarpoq, 2020-imi Tasiilami qilalukkanik qernertartassiissutit quliusut nunguttut, taamaasillunilu ukioq manna Tasiilap eqqaani qernertarniarneq matuneqarpoq.

Qilalukkanik qaqortanik qernertanillu illersuineq piniarnerlu pillugu Namminersorlutik Oqartussat nalunaarutaat nr. 3 27. januar 2017-imeersoq § 6, imm. 3 naapertorlugu Naalakkersuisut ukiumi pisassiiffiusumi tulliuttumi kommunimut pisassiissutinik appaasinnaasut, qilalukkanik qernertanik aqutsiveqarfimmi unioqqutitsisumik piniartoqartoq paasineqarpat. § 7, imm. 3 naapertorlugu akuersissut ataaseq ukiumi pisassiiffiusumit ataatsimit akuersissutip aqutsiveqarfimmi tunniunneqarfiani qilalukkamik ataatsimik pisaqarnissamut periarfissiivoq.

Qulaani taaneqartoq isumaqarpoq 2021-mi pisassiissutissat 2020-mi pisaasimasunut nalimmassarneqarsinnaasut.

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl