Suliffeqarfiit COVID-19-imut suliniutinut tunissuteqarput

Coronamik ajornartoornermi suliffeqarfinnit tunissutit assigiinngitsuupput – ilaatigut tassaallutik TV-kkut ilanngutassiat aamma illersuutit

“Coronavirusimut pitsaanerpaamik imminut qanoq illersorsinnaaneq pillugu raatiukkut TV-kkullu ilanngutassianik akeqanngitsumik tapersiissalluta aalajangersimavarput. Peqqinnissakkut ajornartorsiornerup taassuma sapinngisamik amerlanerpaanit qaangerluarneqarnissaanut tamatta akisussaaffeqarluta isumaqaratta taamaaliorsimavugut," Jacob Olesen, Nanoq Mediami nittarsaassinermut pisortaq, oqarpoq.

Tunissuterpassuit taakkua ilaatigut kingunerisaannik, tunillaassuunnerup siaruarnerata annikillisarnissaanut qanoq iliornissatsinnut oqariartuutigineqartoq nunatsinni sapinngisamik amerlanerpaanut anngussimavoq aammalu Kalaallit Nunaanni COVID-19-imut misissortittoqarsinnaalerluni.

”TELE-POST-imut, tassa nunatsinni suliffeqarfiit inuiaqatigiinnilu atasitsisut annerpaartaattut, coronamik ajornartorsiornermi nuna tamakkerlugu attaveqatigiinnermik qulakkeerinneqataanerput isumalerujussuuvoq pisumilu ilungersunartumi tapersiisinnaanerput nuannaarutigaarput," TELE-POST-imi pisortaaneq, Kristian Reinert Davidsen oqarpoq.

Naalakkersuisut Nanoq Mediamit TELE-POST-imiillu tunissutigineqartut saniatigut suliffeqarfinnit tullinnguuttunit tunissutit tigusimavaat:

- Sermitsiaq.AG COVID-19 pillugu aviisikkut oqaatsit marluk atorlugit paasissutissanik allagarsiussanillu tunissuteqarpoq
- KNR TV-kkut raatiukkullu ilanngutassianik tunissuteqarpoq
- Benjamin Creative filmimik "Corona pillugu meeqqanut" tunissuteqarpoq
Novo Nordisk Fonden misissuisarfinnut pilersinneqaqqammersunut 2,8 millioner kr.-nik aningaasaliissuteqarpoq
- Polar Seafood illersuutinut 2 millioner kr.-nik tunissuteqarpoq
- Umiarsuaatileqatigiiffiit Sikuaq Trawl A/S aamma Niisa Trawl ApS tamarmik immikkut 1,3 millioner kr.-nik tunissuteqarput
- Nuuk Taxi akeqanngitsumik ussassaarinermik tunissuteqarpoq

TV-kkut internetikkullu filmi naatsuliaq "Corona pillugu meeqqanut" kalaallisut isiginnaarneqarsinnaasimavoq

"Videomut 'Corona pillugu meeqqanut' isumassarsiaq ilungersuussilluartuutitta marluk pilersissimavaat, piffissamilu immikkuullarissumi allanut tunniussisaqarusunnerput kisiat pissutigalugu videoliorpugut. Meeqqammi iliuuseqarfigissallugit pitsaanerpaavoq. Namminersorlutik Oqartussat atorsinnaanerlugu aperimmata soorunami angerpavut. Videoliarput angerlarsimaffippassuarni meeqqat angajoqqaallu akornanni Corona pillugu oqaloqatigiinnissamut oqilisaataasimassasoq neriuutigaarput," filmiliortoq Benjamin Creative oqarpoq.

Tunissutinut, Kalaallit Nunaanni COVID-19-ip tuniluunnerata pinaveersaartinnissaanut suliniutigisatsinnut iluaqutaasunut annertuumik qujarusuppugut.