Kalaallit Nunaannut USA-mit suliniutinut aningaasaliissutit

Naalakkersuisut nuannaarutigalugu nalunaarutigissavaat amerikamiut naalakkersuisuisa Kalaallit Nunaanni illersornissamut tunngassuteqanngitsunut suliniutinut US$12,1 millioninik, 83 millioner kr-it missaanik amerlassuteqartunik, aningaasaliissuteqarnissartik aalajangersimammassuk.

Taamaalilluni amerikamiut suleqatigiinnissamik neqeroorutaat akueriniarlugu Naalakkersuisut toqqarsimavaat.

Kalaallit Nunaanni suliassaqarfiit Kalaallit Nunaanni aningaasarsiornerup siuariartornissaanut iluaqusiisinnaasut isiginiarneqarnissaat amerikamiunit kissaatigineqarpoq, matumani aatsitassarsiornermut, takornariaqarnermut illinniartitaanermullu tunngassuteqartut ilanngullugit. Isumaqatigiissutit atuuttut tunngavigalugit Naalakkersuisullu qanimut suleqatigalugit suliniutit piviusunngortinneqassapput. 

Naalakkersuisut siulittaasuat Kim Kielsen oqaaseqarpoq: ” Nunanik allanik qaninnerusumik suleqateqalersarnerit piffissami sivisuumi ineriartortinneqartarput. Nutaarsiassaq nuannersoq una tunngavigalugu USA-mik pitsaasumik suleqateqalernissatsinnik suliniuteqarsimanerput asuliinaasimanngitsoq uppernarsarneqarpoq. Kalaallit Nunaata USA-llu akornanni suleqatigiinnerup annertusarneqarnera, Kalaallit Nunaanni suliniutinut USA-p aningaasaliineranik aalajangersimasumik kinguneqartoq pitsaasuuvoq.”

Illersornersiamut tunnganngitsunik suliniutinut suleqatigiilernissaq ilaatigut Naalakkersuisut amerikamiullu nunanut allanut naalakkersuisoqarfiata  paaseqatigiinnissamik  isumaqatigiissutillu pillugit nalunaarutit (MoU) 2019-imi junimi naammassineqartut inernerisa ilaattut isigineqassaaq.

Tamatuma saniatigut suleqatigiinnerup annertusarnissaanik, USA-mi sinniisoqarfitta pilersinneqarneraniilli Naalakkersuisut suliniutigisaasa inernerisaattut Kalaallit Nunaanni suliniutinut aningaasaliissutit isigineqarsinnaasut, maannakkut amerikamiut Nuummi aallartitaqarfimmik ammaanissamik soqutiginninnerannik akineqarpoq. 

Aningaasaliissutit amerikamiunit immikkut ilisimasalinnit siunnersortinit ikiorserneqartarnissanut aammalu amerikamiut nunanut allanut misiteriaqarfiata suliniutaanut pioreersunut atorneqarnissaat naatsorsuutigineqarpoq. 

Paasissutissat allat pillugit una attavigiuk:

Naalakkersuisup allattaa, Steve Sandgreen, stev@nanoq.gl