Suliffeqarfiit siunissamut sammisumik akissarsianut aningaasartuutinut matussutissinneqartassapput sulisuminnut COVID-19-ip nalaani angerlartitaasunut

Naalakkersuisut suliffeqarnermi illuatungeriinnik oqaloqateqareerlutik aalajangerput siunissamut sammisumik akissarsianut annaasanut taartisiassat 75 pct.-iniit 90 pct.-inut qaffanneqartut, suliffeqarfiit sulisuminnik soraarsitsinatik angerlartitsigallartarnerannut atatillugu

 

Suliffeqarfiit sulisuinut ikiorsiissutit – aamma taaneqartartut “Suliffeqarnermi ikiorsiissutit” – suliffeqarfinnik periarfissiipput akissarsianut aningaasartuutinut matussutissatut aningaasaliiffigineqarnissamik qinnuteqarsinnaanermut, angerlartikkallartariaqakkaminnut COVID-19-ip kingunerisaanik.

 

Ulloq manna tikillugu akissarsianut aningaasartuutinut taartisiassat sulisorisap akissarsiaasa 75 %-erisimavaat, taamaattoq qaffasinnerpaamik sulisukkaartumik qaammammut 20.190 kr.-it. Naalakkersuisut aalajangernerisigut akissarsianut aningaasartuutinut taartisiassat sulisuusup akissarsiaasa 90 pct.-iannik annertussuseqalissaaq, taamaattoq qaffasinnerpaamik qaammammut 20.190 kr.-it.

 

Akissarsianut aningaasartuutinut taartisiassat qaffasinnerusut suliffeqarfiup sulisuminik soraarsitsinani tigumminniinnarsinnaaneranut periarfissanik annertunerulersitsivoq. Taamatut aaqqissuussinikkut suliffeqarfiit sulisuinut ikiorsiissutit suliffissaaleqisut COVID-19-ip kingunerisaanik amerleriarnissaannik annikinnerutitsissaaq.  

 

Naalakkersuisut ilisimatitsipput suli maannamut ikiorsiissutinik aaqqissuussinerit inuussutissarsiortunut tapersersuisussat piumaneqarluartut, tamatumani aamma akissarsianut aningaasartuutinut taartisiassat.

 

Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoq Jess Svane tamanna pillugu ima oqaaseqarpoq: 

”Suliffeqarnermi illuatungeriit peqatigalugit aalajangernerput akissarsianut aningaasartuutinut taartisiassat 75 pct.-iniit 90 pct.-inut qaffanniarlugit isumaqarpoq suliffeqarfiit piffissami COVID-19-ip atuuffigisaani sulisuminnik tigumminniinnarsinnaanerat ajornannginnerulissasoq. Neriuppunga taamatut aaqqissuussinitsigut sulisuusut suliffeqaannarsinnaassasut, suliffissaaleqinermut soraarsitaanatik. Tamanna Naalakkersuisut iluarisimaarpaat. Tamatumuuna innuttaasut akornanni isumannaatsumik atugassaqarnissaq nukittorsarneqassaaq, pissutigalugu ilaqutariit ikinnerusut nalorninartorsiussammata pilersuisup suliffeerunneratigut.”

 

Suliffeqarfinni sulisorisanut ikiorsiissutit aamma inuussutissarsiortunut ikiorsiissutit pillugit paasissutissat annertunerusut atuarsinnaavatit inuussutissarsiortunut quppersakkani ukunani www.businessingreenland.gl (www.big.gl), tassanngaaniillu ikiorsiissutinut assigiinngitsunut links-inik aqqutissaqarpoq.

 

Annertunerusunik paasisaqarumallutit attavigiuk: Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfik mail una atorlugu: isiin@nanoq.gl