Naalagaaffeqatigiit akornanni qanimut oqaloqatigiittarnerit kinguneqarluarput

Naalakkersuisut Inatsisinik atuutsitsinermut suliassaqarfimmi periusissatut suliniutissanullu pilersaarutaani politiinut  aamma pineqaatissinneqarsimasunut inissiisarfinni sulisut akissarsiaqarnermikkut pitsaanerusumik atugassaqarnissaat annertuumik pingaartinneqarsimavoq. Taamaammat ukiuni kingullerni pingasuni justitsministerit aammalu Inatsisinik atuutsitsinermut suliassaqarfimmi Naalakkersuisunut ilaasortat taarseraannikut akornanni ataatsimiinnermi akissarsiatigut pitsaanerusumik atugaqartitsilernissaq aalajangersimasumik immikkoortutut oqaluuserineqartarnikuuvoq.

”Taamaammat matumuuna nuannaarutigeqisannik naammagisimaarluinnakkannillu ippassaq, apriilip ulluisa arfernanni, Justitsministeriaqarfiup Kalaallit Nunaanni pineqaatissinneqarsimasunut inissiisarfinni sulisunut qummut killiliinissamut 38,4 millioninik koruuninik immikkoortitsisimasoq nutaarsiassinneqarpunga.” taama oqarpoq Peqqissutsimut, Isumaginninnermut Inatsisinillu Atuutsitsinermut Naalakkersuisoq, Martha Abelsen, nangillunilu: “Naalakkersuisut assigalugit danskit naalakkersuisuisa suliassaqarfimmut matumunnga salliutitsisimanerannut qujaffigerusuppakka. Kalaallit Nunaanni naalagaaffiup sulisuisa naligiimmik akissarsiatigut atugassaqartinneqarnissaannik qulakkeerinninnissaq Naalakkersuisut Inatsisinik atuutsitsinermut suliassaqarfimmi periusissatut suliniutissanullu pilersaarutaani siullerpaatut inissisimavoq, aammalu sammisaq taanna uannit siulerisanniillu justitsministerit issiasuutitat peqatigalugit oqallisigineqarnikuulluni.”

Aningaasaliissutit danskit aningaasanut inatsisaannit katillugit 49,2 millioninik koruuninik immikkoortitsinerannut ilaapput. Aningaasat immikkoortitat taakkua piffissami 2020-2023-imi Kalaallit Nunaanni inatsisinik atuutsitsinermut suliniutinut atorneqassapput. 

Immikkoortup isumaqatigiissutigineqarneratigut Kalaallit Nunaanni  pineqaatissinneqarsimasunut inissiisarfinni sulisut siunissami Danmarkimi illoqarfiit pingaarnersaata immikkoortuani suleqataasa tunngaviusumik akissarsiarisartagaasa assinganik akissarsisalernissaannut qulakkeerinnittoqarpoq. Taamaalisukkut immikkoortup isumaqatigiissuteqarfigineratigut sulisunik pissarsiniartarnerup attassiinnarniartarnerullu patajaallisarneqarnissaanut tapertaanissaa Justitsministeriaqarfiup naatsorsuutigaa. 

Uani Naalakkersuisut Inatsisinik atuutsitsinermut suliassaqarfimmi periusissatut suliniutissanullu pilersaarutaat pillugu tamakkiisumik atuagaqarsinnaavutit:   https://naalakkersuisut.gl/~/media/Nanoq/Files/Publications/Familie%20og%20Justits/GL/Inatsisinik%20atuutsitsinermut%20suliassaqarfimmi%20periusissatut%20suliniutissanullu%20pilersaarut.pdf

Attavissaq

Paasisaqarnerorusukkuit naalakkersuisup allattaa Inger Heilmann Larsen e-mailikkut: ihla@nanoq.gl imaluunniit oqa. +299 554160-mut attavigiuk