Nuummi pigisaanilu imigassanik aalakoornartortalinnik tuniniaasarnerit sassaalliuteqartarnerillu ulluni 28. marts 2020-miit 15 .april 2020-p tungaanut inerteqqutigineqalerneri.

Nuummi pigisaanilu imigassanik aalakoornartortalinnik tuniniaasarnerit sassaalliuteqartarnerillu ulluni 28. marts 2020-miit 15 .april 2020-p tungaanut inerteqqutigineqalerneri.

Naalakkersuisut Siulittaasuat Kim Kielsen aalajangerpoq imigassat aalakoornartortallit 2,25 volumenprocentimit qummut volumenprocenteqartut tamarmik Nuummi, Kapisilinni Qeqertarsuatsiaanilu tuniniarneqartarneri sassaalliutigineqartarnerilu inerteqqutigineqarallassasut.

Atuarfiit, paaqqinnittarfiit, neriniartarfiit imerniartarfiillu kiisalu kulturikkut aaqqissuussat matuneqarnerisa nalaanni angerlarsimaffinni imigassamik atuineq oqartussanit qanimut malinnaaffigineqarpoq.

Taamak ineriartortoqarnera meeqqanut ilaqutariinnullu taamaallaat eqquinavianngilaq, kisianni aamma Covid-19-ip tuniluunnerata siaruarnissaanut annertunerusumik aarlerinaateqalersissavaa imigassartorfiusumi ataatsimoortoqartillugu inuit tunillaassuuttoqarsinnaanera eqqumaffigineq ajormassuk. Nuummi massakkut tunillatsissimasut 10-t naammattoorneqarput.

- Pissutsit taamaatillugit nappaatillu siaruaqqinnissaa pinaveersaarniarlugu maleruagassaliortariaqartarpugut. Taamatulli aalajangerninni qitiutitakka tassaapput meeqqat, taakkumi toqqissillutik angerlarsimasinnaasariaqarput. Neriuppunga meeqqanut atugassarititat pitsaasuunissaat inuiaqatigiittut ataatsimoorluta akisussaaffittut tigussagipput aammalu inuiaqatigiit toqqissisimanissaanut tamatta peqataassasugut, taamak oqarpoq Naalakkersuisut Siulittaasuat Kim Kielsen.

Taamaattumik Naalakkersuisut aalajangerput imigassanik aalakoornartortalinnik tuniniaasarnerit sassaalliuteqartarnerillu ulluni 28. marts 2020 nal. 20:00-imit 15 .april 2020 nal. 10 tungaanut inerteqqutigineqarallassasut. Taamatut aalajangernermi najugaqarfiit pineqartut tassaapput: Nuuk, Kapisilit Qeqertarsuatsiaallu.

Paasissutissanik annertunerusunik kissaateqartoqaruni Siulittaasup Naalakkersuisoqarfiani pisortaq Simigaq Broberg oqarasuaat +299 55 95 80 aqqutigalugu attavigineqarsinnaavoq.