Nuummi COVID-19-ip siaruarnera akiorniarlugu suliniutit nutaat

Piffissami kingullermi Naalakkersuisut ataatsimut isigalugu inuiaqatigiinni COVID-19-ip tuniluunnerata siaruarneranik annikillisitsisinnaasunik arlalinnik suliniuteqarsimapput. Suliniutit taakkua aallartinneqareersimasut innuttaasut iliuusaannut ileqqorisaannullu annertuumik sunniuteqarsimasut nalilerneqarpoq. Taakkua saniatigut suliniutit allat tamatumunnga sakkortunerusumik Nuummi sunniuteqaqataassasut nalilerneqarpoq. Tamanna tunngavigalugu inuit ataatsimut katersuussinnaasut ikilisaqqinniarlugit, Nuummi innuttaasut akornanni pissusissamisoortumik ungasissuseqarnissaq qulakkeerniarlugu innuttaasut akornanni inummiillu inummut qanillattornaveersaarneq annertunerusumik sunniuteqartinniarlugu allanik suliniuteqartoqalerpoq.

 

Aaqqissuussinernik, pisussanik il.il. inunnik qulinik amerlanerusunik peqataaffigineqartussanik inerteqquteqarneq

  • Aaqqissuussat, pisussat, suliassat assigisaalluunniit inunnik qulinik amerlanerusunik katersuuffiusussaasut ingerlanneqarnissaat peqataaffiginissaalluunniit – ulloq 18. marts 2020 nal. 16:00 aallarnerfigalugu – inerteqqutaagallartinneqalerput. Inerteqquteqarneq aaqqissuussanut, pisussanut il.il. illup iluani silamilu pisussanut taamatuttaarlu pisortanit namminerlu aaqqissuussaanut atuuppoq. Inerteqquteqarneq ullormut 8. april 2020-p tungaanuugallartoq atuutissaaq.
  • Inerteqquteqarneq inuit qulinit amerlanerusut nalinginnaasumik assersuutigalugu pisiniarfinniittarnerannut, pisiniarfissuarnut il.il. atuutinngilaq. Taamatuttaaq inunnik amerlasuunik angallassissutinut nalinginnaasunut (bussit, angallatit, il.il.) suliffimmilu nalinginnaasumik najuunnermut atuutinngilaq. Inerteqquteqarneq naalakkersuinermut pingaaruteqarsinnaasumulluunniit tunngatillugu ataatsimoornernut, tassunga ilanngullugit akerliussutsimik takutitsinernut imaluunniit naalakkersuinikkut ataatsimiinnernut aamma atuutinngilaq.
  • Inerteqquteqarneq angerlarsimaffinnut atuutinngilaq. Taamaakkaluartoq katerisimaarnissamut nammineq pilersaarutit il.il. inunnik qulinik amerlanerusunik peqataaffigineqartussat taamaatinneqarnissaat, peqataasussat sapinngisamik ikilisinneqarnissaat eqqiluisaarnissamullu peqqissutsimut Nunatsinni Nakorsaaneqarfimmit inassutigineqartut, tassa inoqatinut qanillattunnginnissamut kiisalu ileqqorissaarnissamut inassutigineqartut nalinginnaasut malinneqarnissaat sakkortuumik kaammattuutigineqarpoq.
  • Tamatuma saniatigut politiit – ulloq 18. marts 2020 nal. 10:00 aallarnerfigalugu – tamanit orninneqarsinnaasuni inuit qulinik amerlanerusut katersuuteqqappata, tassa COVID-19-imik tunillaassuunissamut aarlerinartorsiortitsippata akuliunnissamut periarfissaqalissapput. Tunillaassortunik nappaalersuaqarneranut Ataatsimiititaliarsuaq inuit katersuuttarneri ikilisinniarlugit inoqatinullu qanillinaveersaarnissamut nalinginnaasumik inassutigisaat eqqarsaatigalugit politiit nalilersuisassapput.

 

Unnukkut klubbinik, imerniartarfinnik, neriniartarfinnik, cafeenik allanillu matusineq.

 

  • Ulloq 18. marts 2020 nal. 16:00 aallarnerfigalugu – unnukkut klubbit, diskotekit, imerniartarfiit, cafeet il.il. matugallarneqarput. Inerteqquteqarneq 8. april 2020-p tungaanuugallartoq atuutissaaq.
  • Ulloq 18. marts 2020 nal. 16:00 aallarnerfigalugu – neriniartarfinni, cafeeni allanilu atuisunik isertoqarnissaq inerteqqutaagallartinneqalerpoq. Taamaattorli neriniartarfiit, cafeet allallu nerisassanik imigassanillu suli pilersuisinnaassapput (take away il.il.). Inerteqquteqarneq 8. april 2020-p tungaanuugallartoq atuutissaaq.
  • Neriniartarfiit, cafeet allallu tamarmik, nerisassanik imigassanillu avammut tunniussisartut imaaliussapput:
    • Eqqiluisaarluarnissamut ileqqorissaarnissamullu Nunatsinni Nakorsaaneqarfimmit inassutigineqartut sulisunit tamanit malinneqarnissaannik qulakkeerinnissapput.
    • Inuit COVID-19-imik ersiuteqartut angerlarsimaffimminnut mattunnissaat pillugu paasissutissanik nivinngaassuissapput.
    • Eqqiluisaarluarnissamut ileqqorissaarnissamullu paasissutissanik nivinngaassuissapput.
    • Sapinngisamik atuisunut imeqarnissaa qaqorsaateqarnissaalu aamma/imaluunniit assannut spritteqarnissaa qulakkeerneqassaaq.
    • Atuisut imminnut qanippallaannginnissaat qulakkeerneqassaaq. Silataani tulleriiaartoqarataarnerani tamanna aamma atussaaq.

Nuuk Centerimik pisiniarfinnillu ulluinnarnilu atortussanut pisiniarfinnik il.il. matusineq

 

  • Ulloq 18. marts 2020 nal. 16:00 aallarnerfigalugu – Nuuk Center NC matugallarneqarpoq. Inerteqquteqarneq Pisiffimmut Nuup qeqqaniittumut atuutinngilaq. Inerteqquteqarneq 8. april 2020-p tungaanuugallartoq atuutissaaq.
  • 18. marts 2020 nal. 16.00 aallarnerfigalugu – pisiniarfiuteqartunut allanut tunngatillugu inerteqquteqarallarneq atuutilerpoq. Inerteqquteqarallarneq 8. april 2020 tungaanuugallartoq atuutissaaq.

Illup iluani timersortarfinnik sukisaartarfinnik allanillu matusineq.

  • Ulloq 18. marts 2020 nal. 16:00 aallarnerfigalugu – illup iluani timersortarfiit sukisaartarfiit allallu, tassunga ilanngullugit naluttarfik Malik, Katuami filmertarfik, isiginnaartitsisarfiit, timigissartarfiit palersartarfiillu matugallarneqarput. Inerteqquteqarneq 8. april 2020-p tungaanuugallartoq atuutissaaq.

Ulluinnarni atortussanut  pisiniarfinnut (dagligvarebutikker) piumasaqaatit nutaat.

  • Ulluinnarni atortussanut pisiniarfiit imaaliussapput:
    • Pisiniartut tamarmik immikkut natermi 4 m2-inik ungasitsiginissaasa qulakkeernissaa.
    • Eqqiluisaarluarnissamut ileqqorissaarnissamullu Nakorsaaneqarfimmit inassutigineqartut sulisunit tamanit malinneqarnissaannik qulakkeerinnissapput.
    • Inuit COVID-19-imik ersiuteqartut angerlarsimaffimminnut mattunnissaat pillugu paasissutissanik nivinngaassuissapput.
    • Tamat sumiiffigisinnaasaanni pissuserissaarnissaq eqqiluisaarnissarlu pillugit paasissutissanik ikkussuineq.
    • Atuisut errortorfissamik qaqorsaammillu / assanut sprittimik atuisinnaanissaat sapinngisamik anguniarneqassaaq.
    • Inuussutissat poortorneqarsimanngitsut tuniniarneqarneranni aaqqateqarnissap qulakkeerneqarnissaa.
    • Atuisut imminnut qanillattorpallaannginnissaannik qulakkeerinninneq – pisiassanik tigooqqaanermi aamma. Silataani tulleriiaartoqarataarnerani tamanna aamma atussaaq.

 

Namminersorlutik inuussutissarsiortut pisinianik attaveqanngitsoorsinnaanngitsut

  • Namminersorlutik inuussutissarsiortut ingerlatsinerat – 18. Marts 2020 nal. 16:00 aallarnerfigalugu – pisisartunik nioqquteqartumillu imminnut attunngitsoorsinnaanngitsut inerteqqutaatikkallarneqalerput, matumanilu nujalerisut, kakiuisartut, tagiartuisartut, pinnersaasartut il.il. Inerteqquteqarneq 8. april 2020-p tungaanuugallartoq atuutissaaq. 

Inuit Kalaallit Nunaannut Danmarkimiit nunanillu allanit utertut

  • Danmarkip killeqarfiini tamani 14. Marts 2020 aallarnerfigalugu killeqarfimmi nakkutilliilernerinik iserniartunillu killilersuineq pillugu.
  • Kalaallit Nunaanni innuttaasut Qallunaat Nunaannit nunanillu allanit angalasimallutik utertut ulluni 14-ini angerlarsimaannarnissaat sakkortuumik kajumissaarneqarput. Pineqartut angerlarlutik angalanerminni tamanit orninneqarsinnaasuni siunertamik naapertuuttumik pissusulersortariaqarput, matumanilu inuppassuit angallannermi atortagaannik atuineq eqqarsaatigalugu, kiisalu COVID-19-imik ersiutit immikkut maluginiassavaat.
  • Kalaallit Nunaanni innuttaasut najugaqartut utertut peqqinnissaqarfinni, politini, pinerluttunik isumaginnittoqarfinni, utoqqaat illuini paaqqinniffinnilu imaluunniit isumaginninnikkut aarlerinartorsiortunik sullissisut sulisitsisuminnut piaartumik suliartorsinnaanissaat qulakkeerneqassaaq, pineqartut COVID-19-imik tunillatsissimanngippata.
  • Sulisut peqqinnissaqarfinni, politini, pinerluttunik isumaginnittoqarfinni, utoqqaat illuini paaqqinniffinnilu imaluunniit isumaginninnikkut aarlerinartorsiortunik pingaarutilinnik sullissisut nunanillu allanit angalanermit utertut sulisitsisutik attavigissavaat tamannalu tunngavigalugu kiisalu pineqartup sulilernissaa illersorneqarsinnaasutut isigineqarpat pisut ataasiakkaat naapertorlugit nalilersuisoqartassaaq.

Kalaallit Nunaat qimallugu angalasarneq

  • Innuttaasut Nuuk qimallugu angalasinnaanngillat. Inerteqqut tamanna 8. April 2020 tungaanut atuutsinneqarallassaaq. 
  • Nuup avataani innuttaasut Kalaallit Nunaata iluani angalasinnaapput, kisianni Nuummuunngitsoq Qallunaallu Nunaannuunngitsoq, tallimanngorneq 20 marts nal. 24.00-p tungaanut.