14. marts 1970-imiit Blok 5-imi gassimik qaartoornermit ukiut 50-it qaangiunnerini

Aviisimi allaatigisaq – Ineqarnermut Attaveqaqatigiinnermullu Naalakkersuisoq Karl Frederik Danielsen-imit

Ukiut 50-it matuma siorna Blok 5-imi gassimik qaartoornermi ajunaartut eqqaaniarlugit, ajoqusersimasullu ataqqinaaserniarlugit, taamani sanasut annattut, eqqugaasunullu ilaqutaasut 2020-mi arfininngornermi marsip 14-iani katersuupput. Eqqugaasut ilaqutaasullu eqqarsaatitsinniipput.

Gassimik qaartoornermit eqqugaasimasut, eqqugaasimasunulluunniit ilisarisimannittut arlaqarput. Ajutoornermi ajunaartut eqqaamassallugit taakkununnga pingaaruteqarpoq. Sanasut inuusuttut qilanaarlutik suliartortut, suliassatigut misilittagaqarumallutik Kalaallit Nunaannut suliartorput. Illerfimmiillutilli angerlarlutik. Erla Vinter-ip angutaa inissiarsuarnik aamma sanaartoqataasimavoq, sanasullu ajunaarsimasut eqqaaniarlugit ujarattaliisoqarnissaa Erla-p ukiorpassuarni anguniarsimavaa. Taamani pisimasoq Erla-mut, ajunaartunullu ilaqutaasunut annertuumik sunniuteqarsimavoq, pisimasullu puigorneqannginnissaa taakkununnga pingaaruteqarluni.

Ukiut 50-it matuma siorna Blok 5 sanaartorlugu naammassingajalerluni gassimik qaartoorfiuvoq. Tamannalu ulluinnarni suliartortilluni takorlooruminaattarpoq. Ajutoorneq annertooq pinngitsoortinneqarusunnarsimassagaluartoq, sanasullu katillugit aqqanillit ajunaassutigisaat.

Inissiarsuaq sanaartortitsisumut Grønland Tekniske Organisation-imut, GTO-mut, tunniunneqartussaasoq sanasut 20-t sinneqartut inaarsaaleruttorsimapput. Taakkununnga ilaasimavoq sanasoq 21-nik ukiulik Eli Damberg Nordjyllandimeersoq, qaartoornermit sanaartornermi atortut aseqqukuinit uumalluni matoorussaasoq.

Ullup qeqqasiortussat siulliit ingerlareersut, ulloqeqqariitsiartoq qaartoorneq pivoq. Akunnerit qulit missaat annaassiniarneq ingerlavoq. Qarmakut nakkaassinnaaneri aarleralugu sanaartukkap nunallu qerisup iluatigut Eli annaanniarlugu sulluliortoqassasoq aalajangerneqarpoq.

Qaartoorneq illoqarfik tamakkerlugu tusaaneqarsinnaasimavoq. Blok 4-mi 6-imilu igalaat blok 5-imut sammisut aserortiterput. Blok 6-imut inuit nutsereersimapput igalaallu aseqqukuinit inuppaaluit igalaaminernik kiinnamikkut timimikkullu ikilertiterlutik.

Allaanngilaq qaartartoq qaarpallattoq, illoqarfimmilu paatsiveerunnersuamik kinguneqartitsilluni. Uivernermi kikkut tamarmik ilaquttatik ajunnginnersut paasiniarlugu ulapputigaat.

Ajutoornerup kingunerisaanik, sinerissami inissiarsuarni tamani kissarsuutit gassitortut, kissartuutinik sarfatortunik taarsersorneqarput.

Misigissutsikkut eqqugaaneq misigaarput. Ajunaarnersuaq arlaqartut annertuumik suli misigisaqaatigaat.

Siunissaq eqqarsaatigalugu alianartumik pisimasumut eqqugaasimasut tamaasa ajunnginnerpaamik kissaappakka, alianartumillu pisimasumi asasaminnik annaasaqarsimasunut misiginneqataavunga.

Eqqaaneqarnerat ataqqinartuuli.