Conoraviruseqarnerani angallanneq

Angallassineq pillugu:

Angalannerup ingerlaannarneranut atatillugu Nunatsinnut Nunatsinniillu kiisalu nunatsinni angalasut nalinginnaasumik innimiginneqquneqarput isumatusaaqquneqarlutillu. Tassa Nakorsaaneqarfiup nittartagaatigut www.nun.gl-ikkut oqartussanit inassutigineqartut malinneqartariaqarput.

 

Nunatta iluani angalanermi nunanulluunniit allanut angalanermi angallassissutini angalasut amerlassusigisinnaasaat killilerneqanngillat.

 

Nunatsinni angallassissutit atorneqartut, soorlu timmisartut, qulimiguullit umiarsuillu issiavinni ilaaffissani ilaasorisinnaasatik suli angallassinnaavaat.  Tamanna Air Greenlandip Københavnip Kangerlussuullu akornanni angallassineranut aamma atuuppoq.

 

Inassutigineqartut taakkua Tunillaassortunik nappaalanersuaqarneranut ataatsimiititaliarsuup nutaanik inassuteqarnissaata tungaanut atuutissapput.

 

Mittarfiit pillugit:

Mittarfeqarfinni inini inuit amerlassusigisinnaasaat killilerneqarput. Tunillaassortunik nappaalanersuaqarneranut ataatsimiititaliarsuup inassuteqareerneratigut taamaasiortoqarpoq. Tamanit orninneqarsinnaasut matumani pineqarput soorlu mittarfeqarfinni aallartarfiit tikittarfiillu aamma neriniartarfiit.

 

Inini inuit amerlanerpaaffissaattut akuerineqarsimasuni inuit amerlanerpaaffissaasa affaannaasarnissaat inassutigineqarpoq. Aallartussatut tikittussatullu naatsorsuutigineqartut inini taakkunaniissinnaapput.

 

Angalasunut qanigisat inuulluaqqusiartorlutik tikilluaqqusiartorlutillu mittarfeqarfinni aallartarfinnut tikittarfinnullu isertannginnissaat Mittarfeqarfiit inassutigaat. Mittarfeqarfinni aallartarfiit tikittarfiillu angalasunut tikittunut aallartussanullu taamaallaat atorneqaqqusaapput. Malittarisassat taakkua maannamut suli atuupput.

 

Angalasussat mittarfeqarfinni pissusilersuutaannut Mittarfeqarfiit uku inassutigai:

 

  • Aallalernermi tunniussisarfimmut 2 meterinik ungasitsigalutit UNIGIT

  • Billetsit nassatatillu tunniutikkit

  • Kingorna titarnerup killinganut uterit

  • Kingornalu ilaanissamut ikissutissat tigujuk

  • Timmisartumut ikileruit ilaanissamut ikissutissat nammineq scannerivikkoortissavat

 

Kangerlussuarmi mittarfeqarfik pillugu:

Københavnimut Københavnimiillu angallanneq ingerlaannassappat Kangerlussuarmi inuit amerlanerpaaffigisinnaasaannik killiliinissaq pillugu inassuteqaat malinneqarsinnaanngilaq. Tunillaassortunik nappaalanersuaqarneranut ataatsimiititaliarsuarmi Siulittaasoq isumasioqatigereerlugu taamaasiortoqarpoq.

 

Taamaattorli Kangerlussuarmi Mittarfeqarfinni sulisunut qanoq iliornissamut malittarisassanik sukangasuunik saniatigut allanik malittarisassaliortoqarsimavoq.

 

Angalasunik coronavirusimik tunillatsissimasunik Kangerlussuarmut tikittoqassagaluarpat Mittarfinnut unnuisarfimmullu upalungaarsimanissamut periutsit immikkut ittut aamma suliarineqarsimapput

 

Tunu pillugu:

Norlandair Nerlerit Inaannut timmisartuussisartoq, Akureyrimut Akureyrimullu aqqut pillugu Nunatsinni Politiinik qanimut oqaloqateqartarpoq politiillu inassutaannik innersuussutaannillu tamatigut malinnittarluni.

 

Norlandairip pilersaarutaasut naapertorlugit timmisartuussinerit ingerlatiinnarpai, matumanili angallassassaqarnissaa assartuussassaqarnissaalu piumasaqaataavoq.

 

Islandikkoorluni Nunatsinnut angalanermut killilersuinerit pillugit Air Iceland attaveqaqatigineqarsimavoq.

 

Annertunersumik paasisaqarusukkuit Naalakkersuisup allattaa Anders Samuelsen oqarasuaatikkut 29 03 20 imaluunniit e-mailikkut ansa@nanoq.gl attavigiuk