Kofoed Skolemi angerlarsimaffeqannginneq pillugu isumasioqatigiinneq iluatsilluartoq

Sisamanngormat Peqqissutsimut, Isumaginninnermut Inatsisinillu Atuutsitsinermut Naalakkersuisup Martha Abelsenip aamma Ineqarnermut Attaveqaqatigiinnermullu Naalakkersuisup Karl Frederik Danielsenip Kofoed Skole suleqatigalugu Kofoed Skolemi atuartunut angerlarsimaffeqannginneq pillugu isumasioqatigiissitsipput.

Sisamanngormat ullup qeqqanut Martha Abelsenip Karl Frederik Danielsenillu Kofoed Skolemi atuartut 30-t missaaniittut naapeqatigaat. Sammineqartorlu tassaavoq angerlarsimaffeqannginneq, isumasioqatigiinnermilu innuttaasut angerlarsimaffeqanngitsut ulluinnarni unammilligassat sorliit misigisartagaat pillugit ilisimasaqalernissaq siunertarineqarpoq, angerlarsimaffeqanngitsunullu pissutsit pitsanngorsarneqassappata angerlarsimaffeqannginnerlu pitsaaliorneqassappat qanoq pisoqassanersoq isumaat paasiniarneqarput.

Isumasioqatigiinnermi misigisimaneq nuannerpoq, peqataasullu isummatik assut saqqummiukkusuppaat. Sammisat arlallit oqaloqatigiissutigineqarput, soorlu inunnut annikitsuinnarmik akissarsiaqartunit ineqarnermut akinik akilersinnaasaannik qanoq qulakkeerinnittarnersut, angerlarsimaffeerunnermilu imminut naleqassusermut imminullu paasinninnermut qanoq isumaqartiginersoq.

”Isumasioqatigiinnermi Kofoed Skolemi atuisartut taama amerlatigisut peqataanerat nuannaarutigaara. Assorsuaq ilikkagaqarnarpoq uannullu tusarlugu innuttaasut angerlarsimaffeqanngitsut namminneq suut unammillernarnerpaatut isigisaat pillugit paasisaqarnarluni. Suliniutitta angerlarsimaffeqannginnermut sammititat pitsanngorsartariaqarneri qularutissaanngilaq, matumanilu sulinermi innuttaasut namminneq isumaat aamma ilanngutitinneqarnissaat aalajangiisuuvoq.”
Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen taama oqarpoq.

Ineqarnermut Attaveqaqatigiinnermullu Naalakkersuisoq Karl Frederik Danielsen ilassutitut oqaaseqarpoq: “Ippassaq isumasioqatigiissitsineq ersarissumik takutitsivoq tamakkiisumik isiginnittumik eqqarsartariaqalersugut. Innuttaasut angerlarsimaffeqanngitsuusut atugaat pitsanngorsassagutsigit, innissiaqarneq, peqqissuseq isumaginninnikkullu neqeroorutit pineqarajupput.”

Isumasioqatigiissitsineq angerlarsimaffeqannginneq pillugu qulaajaanermut annertuumut ilaavoq.

Sukumiinerusumik paasissutissat pillugit attavissaq naalakkersuisup allattaa Inger Heilmann Larsen e-mailikkut: ihla@nanoq.gl imaluunniit oqa. + 299 554160