Namminersorlutik Oqartussat inissiaataasa kommuninut tunniunneqarnissaat

Naalakkersuisut naalakkersuinikkut isumartik mumillugu pisortat inissiaataasa attartortittakkat tamarmik inissianik aqutsivimmut ataatsimut nuunnialeraat borgmester Charlotte Ludvigsen 2. marts 2020-mi tusagassiorfinnut nalunaaruteqarluni oqarpoq. Charlotte Ludvigsen ima aamma oqarpoq:

” Takorloorsinnaanngilarali inissianik milliardinik arlalinnik naleqartunik akeqanngitsumik Naalakkersuisut tigusissasut”.

Borgmester Charlotte Ludvigsen-ip oqaaseqaataanut tunngatillugu sukannernerpaamik erseqqissaatigissavara Naalakkersuisut kommunit inissiaataannik tigusinissartik siunnerfigisimanngisaannarmassuk.

Namminersorlutik Oqartussat inissiaataasa attartortittakkat kommuninut tunniunneqarnissaat marsip ulluisa pingajuanni ullormi immikkut sammisaqartitsiviusumi saqqummiunneqarpoq. Saqqummiussinermi Naalakkersuisut nunatsinnilu borgmesterinit tallimaasunit sisamat peqataapput. Tassani pisortat inissiaataanni attartortittakkani tamarmiusuni aserfallatsaaliuinermi kinguaattoorutit kiisalu siunissami unammilligassat pillugit paasissutissat arlallit saqqummiunneqarput. Saqqummiussinermilu siunissami ineqarnerup aaqqissuussaanerata qanoq isikkoqarsinnaanera pillugu periarfissatut ilusiliat assigiinngitsut arfinillit saqqummiunneqarput.

Marsip ulluisa sisamaanni qulequtaq Naalakkersuinikkut Ataqatigiissaarisoqatigiinni suliarineqarpoq. Tassani Namminersorlutik Oqartussat inissiaataasa attartortittakkat kommuninut tunniunneqarnissaat pillugu tunngaviusumik aalajangiinerusimasup atuutsiinnarnissaa isumaqatigiissutigineqarpoq.

Pisortat inissiaataanni attartortittakkani iluarsaassinissamik pisariaqartitsineq ullormut 0,5 mio. koruuniniit 1 mio. koruuninut annertusisarpoq. Taamaalillunilu inissiat aserfallakkiartornerat unitsinneqassasoq isumaqatigiissutigineqarpoq.
Namminersorlutik Oqartussat inissiaataasa kommuninut tunniunneqarnissaanut piareersaatitut pisortanit suleqatigiissitamik ataatsimoorussamik pilersitsisoqassasoq aalajangiussat ilagaat. Suleqatigiissitap pissutsit arlallit siunnersuuteqarfigissavaat, taakkua ataanni kinguaattoorutit taakkualu aaqqiiffigineqarnissaata aningaasaliiffigineqarnissaat. Suleqatigiissitap kommunit qanoriliorlutik siunissami ineqarnermut akiliutinik imminut nammassinnaasunik taamaalillunilu pisortat inissiaataasa aserfallakkiartornerat siunissami ingerlaannannginnissaanik qulakkeerinissaannut siunnersuuteqassalluni.

Aalangiinissamut tunngavissamik suliaqarnissaq
Namminersorlutik Oqartussat inissiaataat attartortittakkat tunniunneqassappata, kommuninut tamanut ataatsikkut tunniunneqartariaqartut isumaqatigiissutigineqarpoq. Tamannalu 1. januar 2022-mi pissasoq aamma isumaqatigiissutigineqarluni, tassanilu pisortanit suleqatigiissitamik ataatsimoorussap inassuteqaatai aallaavigineqassasut isumaqatigiissutigineqarpoq.

Naalakkersuisoq Karl Frederik Danielsen ima oqarpoq:

”Kommunit suli Namminersorlutik Oqartussat inissiaataat attartortittakkat kommuninut tunniunneqarnissaat kissaatigigaat inissinneqarmat nuannerpoq. Siunissami tunngavissat uppernarsarluakkat misissoqqissaakkallu tunngavigalugit aaqqissuussaanermi attartortut pisariaqartitaasa pingaartinneqarnissaannik, inuiaqatigiinnilu aningaasaqarneq pitsaanerpaamik ingerlanneqarnissaanik suliaqarnera ingerlatiinnassavara. Minnerunngitsumillu nuannaarutigaara, iluarsaassinissamut kinguaattoorutit annertusiartuinnarunnaarnissaannik suliniuteqarnissaq isumaqatigiissutigigatsigu”.

Allanik apeqqutissaqarnermi saaffissaq: Naalakkersuisup allattaa Anders Samuelsen, ansa@nanoq.gl.