Kunngeqarfiup 2021-2030-mut Issittoq pillugu Periusissiassaanut atatillugu ingerlatat

Kunngeqarfiup maannakkut Issittoq pillugu periusissiaa maannakkut atuuttoq atorunnaalerpoq, taamaattumillu periusissiassap suliarineqarnera aallartinneqarpoq, suliarinerani soqutiginnittut arlallit peqataatinneqarput. Taamaammat ingerlatanik uani nassuiarneqartunik ingerlataqartoqarsimallunilu pilersaarusiortoqarpoq. Suliarinerani nunaqqatitta kalaallillu suliffeqarfiutaasa ilaatinneqarnissaannut tunngatillugu Naalakkersuisut immikkut ittumik salliutitsipput. Periusissiassaq naalagaaffeqatigiinnermi nunat immikkoortuinit pingasunit naalakkersuisut suliaraat, taakkunanngalu 2020-p naajartuaarnerani aamma akuerineqassaaq.

 

Sapinngisaq tamaat peqataatitsinissamik kissaateqartoqarnera malillugu, periusissiassap imarisassaanut isiginninnernik isummanillu oqallisiginninneq ilanngullugu, qinikkat ataatsimiisinneqarnissaannik aallarniisoqarsimavoq. Tamassumunnga atatillugu marsip naanerani 2020 Ilulissani qinikkanik ataatsimiititsinissarsuarmut ataatsimiititaliant attuumassuteqartut inatsisartullu qaaqquneqarput. Issittoq pillugu periusissiassap imarisassaanik inatsisartut immersuisinnaanissaat naalakkersuinikkullu tunngasutigut ilanngussaqarsinnaanissaannik periarfissinneqarnissaat siunertarineqarpoq.

 

Taakkua saniatigut soqutiginnittut attuumassuteqartut oqaloqatigiissapput, tassani ilisimatusarnermik suliaqartut, inuussutissarsiortut, NGO-t kommunillu ilanngullugit. Siunertarineqarpoq soqutigisaqartut Kunngeqarfiup issittoq pillugu periusissiaanut isummaminnik isiginninnerminnillu tunniussaqarnissaat..

 

Sapinngisaq tamaat peqataatitsinermi innuttaasunik tamanut ammasumik ataatsimiisitsinissaq aammattaaq anguniarneqarpoq. Kunngeqarfiup Issittoq pillugu periusissiassaata suliarineqarnerata saqqummiunneqarnissaa siunertarineqarpoq, apeqquteqarsinnaanermillu naggaserneqarumaarluni.

 

Siunertaavorlu inatsisartunut ilaasortat soqutiginnittullu oqaloqatigiinnerni  ataatsimeersuarnermi peqataasimasut  killiffik pillugu tusagaqarnissaannik periarfissaqarnissaat. Maajip 2020 aallartinnerani innuttaasunik ataatsimiitsitsinissaq anguniarneqarpoq.

 

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq oqarpoq:

 

Issittumi ineriartornermi kiisalu Issittoq pillugu nunat tamalaat aaliangigaat, ajunngitsut ajortullu, kalaallit innuttaasuinut toqqaannartumik sunniuteqartarput. Nunanut allanut tunngasutigut Issittumut attuumassutillit sammisat pillugit inissisimaffipput tassaavoq Naalagaaffeqatigiinnermi illuatungeriiusugut amerlanertigut suleqatigiinnissatsinnut pisussaaffeqaratta, tassami taakku sammisat nunanut allanut ilaatigullu sillimaniarnermut tunngasutigut naalakkersuinermut attuumassuteqartarmata.

Taamaammat uagut – kalaallit – soqutigisavut periusissiassami salliutinneqarnissaasa qulakkeerneqarnissaat Naalakkersuisunit pingaartinneqarpoq. Tamanna tunngavigalugu Naalakkersuisunut pingaaruteqarpoq Issittumi inuusut sapinngisaq tamaat peqataatinneqarnissaasa qulakkeerneqarnissaa.

 

Paasissutissat sukumiinerusut uunga saaffiginninnikkut pissarsiarineqarsinnaapput:

 

Naalakkersuisoqarfimmi pisortaq Kenneth Høegh, oqa. 34 51 48, e-mail: kenh@nanoq.gl