Vittus Qujaukitsoq Torontomi Arctic360 ataatsimeersuarnermi peqataavoq

Isumalioqatigiittarfik Arctic360 ”Investing in 21st century critical infrastructure and transportation corridors” (ukiut untritilikkaat 21-anni attaveqaatinik assartuiffinnillu pingaarutilinnut aningaasaliinerit) qulequtaqartumik ataatsimeersuarpoq, tassanilu Aningaasaqarnermut Aatsitassanullu Naalakkersuisoq Vittus Qujaukitsoq aningaasaliisinnaasunut nunani allaneersunut Kalaallit Nunaanni aningaasaliinissamut periarfissaasinnaasunik saqqummiussivoq.

”Kalaallit Nunaannut aningaasaliisartunik aningaasaliinissamut pilerilersitsinissaq siunertaralugu, ataatsimiinnerni ataatsimeersuarnernilu nunanit tamalaaneersunit peqataaffigineqartuni Naalakkersuisut peqataasarnissaat pingaaruteqarpoq”, Vittus Qujaukitsoq nassuiaavoq imalu nangilluni:

”Ilaatigut Russel Read, C Change Groupimi, tuluit aningaasaliisartut siunnersortillu peqatigiiffiisa ataatsimooqatigiiffiani angisuumi pisortatut partneriusoq arlaleriarlunga oqaloqatigaara. Oqaloqatigiinnerillu dr. Readip aningaasaliiffiusinnaasutut periarfissat qimerluualaarniarlugit Kalaallit Nunaannut tikeraarnissaani aallaaviussapput. Ataatsimeersuarnermi inunnik naapitsilluni Kalaallit Nunaannik oqaluuserinninnikkut attaveqarfinnik pilersitsisarpugut, kingorna illuatungeriilluta iluaqutigisinnaasatsinnik”.


Russel Read piffissami 19. – 21. februar Nuummut tikeraassaaq.

Ataatsimeersuarnermut tapiliullugu Naalakkersuisoq Vittus Qujaukitsoq Nunavup naalakkersuisuisa sinniisaanik arlalinnik, ilaatigut Nunavumi naalakkersuisut siulittaasuata Joe Savikataap Nunavumilu aningaasaqarnikkut ineriartornermut assartuinermullu ministerip David Akeeagok peqataaffigisaannik, Ottawami ataatsimeeqateqarpoq.

Taamattaaq Vittus Qujaukitsoq Arctic Fishery Alliancemik, Nunavumi inoqarfinnit sisamanit avannarlersaanit sinniisunit tamakkiisumik pigineqartumik, ilaatigullu aalisartunik nunatta kitaaneersunik arlalinnik suleqateqarluni niuernermillu toqqammaveqartumik alisarnermik ingerlatsinissamik siunertaqartumik pisortatigoortuunngitsumik ataatsimeeqateqarpoq.



Erseqqinnerusumik paasissaqarfissatut attaveqarfissaq:

Martin Christiansen (Aningaasaqarnermut Naalakkersuisoqarfik)
Toqq/direkte 345213
MCHR@nanoq.gl