Aalisarneq pillugu Ataatsimiititaliarsuaq Ilulissani innuttaasunik ataatsimiititsinissamut aggersaavoq

Ataatsimiititaliarsuaq aalisarnermik inuussutissarsiuteqarnermi periarfissat ajornartorsiutillu pillugit oqallitsitserusuppoq, nunallu immikkoortuani soqutiginnittut tamarmik ataatsimiititaliarsuarmik oqalliseqateqarnissamut maannakkut periarfissinneqarput.

Aalisarneq pillugu Ataatsimiititaliarsuaq aalisarneq pillugu inatsisissamut nutaamut aamma inassuteqaateqartussaavoq, tassani aalisakkanik pisuussutit ataatsimut pigisagut inuiaqatigiinni annertunerpaamik pissarsissutigineqarnissaat qulakkeerneqassaaq.

Ataatsimiititaliarsuup oqallisissiaq ”Aalisagaativut – atugarissaarnerput” siunissami aalisarneq pillugu politikkissamut inassuteqaataagallartunik arlalinnik imaqartoq decembarimi saqqummersippaa.

Oqallisissiami siunertaavoq innuttaasut oqallinnerannut siunissamilu politikkissaq pillugu oqaloqatigiinnissamut peqatigitillugulu ataatsimiititaliarsuup suleriaqqinnissaanut isumassarsiffiusinnaasumut tunngavissiilluarpoq.
Ataatsimiititaliarsuaq innuttaasunik ataatsimiititsinermi sulinini pillugu ilisimatitsissaaq Qeqertarsuullu Tunuani aalisarneq oqallisissiaq aallaavigalugu sammineqassalluni.

Oqallisissiaq Naalakkersuisut nittartagaanni takuneqarsinnaavoq uani.
Aalisarneq pillugu ataatsimiititaliarsuaq Nuummi 12. decembari 2019 innuttaasunik ataatsimiititsivoq, maannakkulu Ilulissani ataatsimiititsissalluni, tassani kikkut tamarmik tikilluaqqusaapput.

Innuttaasunik ataasimiititsineq kulturikkut Illorsuarmi Sermermiuni marlunngorneq ulloq 18. februari nal. 19.00 ingerlanneqasaaq

Aggialluarisi!

Aalisarneq pillugu Ataatsimiititaliarsuaq