Namminersorlutik Oqartussat inissiaataasa kommuninut tunniunneqarnissaat

Borgmester Charlotte Ludvigsen 24. januar 2020-mi Kommuneqarfik Sermersuup Namminersorlutik Oqartussat inissiaataat inoqanngitsut tigorusukkai tusagassiorfinnut nalunaaruteqarluni oqarpoq.

Namminersorlutik Oqartussat inissiaataasa kommuninut tunniunneqarnissaat Marts-ip pingajuani sisamaanilu 2020-mi Naalakkersuisunit aamma borgmesterinit Naalakkersuinikkut Ataqatigiissaarisoqatigiit ataatsimeeqatigiinnerini suliarineqartussaavoq. Tassani Ineqarnermut Pilersaarummi misissueqqissaarnerit inerneri saqqummiunneqassallutik.

Ineqarnermut Pilersaarut suliaavoq kommuninit aamma Naalakkersuisoqarfinnit arlalinnit peqataaffigineqartoq, pisortani suliassaqarfiit akimorlugit ataqatigiissaaraluni suliarineqartoq. Taakkununngalu aamma Kommuneqarfik Sermersooq peqataatitaqarpoq.

2016-imi kommunit tamarmik inissiaatiminnut pilersaarusiornissamik nalunaarutiminnik atsiorput, tamannalu maajip qulingani 2019-imi ataatsimiinnermi uppernarsaqqinneqarpoq. Immikkoortumut pilersaarutit suliassaqarfimmut ataatsimoortumik erseqqissaataallutik takussutissiueqataasussaapput aammalu Namminersorlutik Oqartussat aamma kommunit akornanni suliassaqarfinnik tunniussinissamut atatillugu isumaqatiginninniarnernut tunngavigineqartussaallutik. Kommunit arlallit aatsaat 2019-imi immikkoortumut pilersaarutinik tunniussipput taakkununngalu Kommuneqarfik Sermersooq ilaavoq.

Naalakkersuisoq Karl Frederik Danielsen oqarpoq:

”Borgmester Charlotte Ludvigsenip ineqarneq soqutigimmagu nuannerpoq aammalu marsip qaammataata aallartinnerani Naalakkersuinikkut Ataqatigiissaarisoqatigiinni angusaqarfiusumik ataatsimeeqatigiinnissamut qilanaarpunga.”

Namminersorlutik Oqartussat illuutaanni inissiat inoqanngitsut pillugit assigiinngitsunik tunngavilimmit inoqanngitsuusut INI A/S ilisimatitsivoq. Ilaasa iluarsaanneqarnissaat, ilaasa oqummik ajornartorsiorfiunerat pissutaalluni imaluunniit ilaasa sillimmasiisarnermi suliaaneri pissutaallutik. Inissiat inoqanngitsut taamaalillutik attartortussat nutaat iserternissaannut piareersarneqartuupput.

Namminersorlutik Oqartussat inissiaataasa attartortittakkat sapinngisamik pilertortumik attartorteqqinnissaat INI A/S-ip soorunami anguniagaraa, kisiannili inissiat iluarsaatassat

iserterfiginissaannut piareerniarlugit iluarsaanneqaqqaanngippata attartortissinnaanngilai.


Annertunerusunik apeqqutissaqarnermi saaffissaq: naalakkersuisup allattaa Anders Samuelsen,  email: ansa@nanoq.gl