Ukioq manna Namminersorlutik Oqartussat kulturimik sulialinnut aningaasaliissutit siulliit tunniunneqarput

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisup, Ane Lone Baggerip, ukioq manna kulturimut sulialinnut aningaasaliissutit siulliit Kalaallit Nunaanni eqqumiitsuliortunut arfineq pingasunut tunniuppai. Eqqumiitsuliortut arfineq pingasut kulturimut sulialinnut aningaasaliissutinik legatinik tunisittut siulliit ukuupput:
  • Qaammatinut sisamanut Anders Berthelsenip Kalaallit Nunaanni nipilersornerup oqaluttuassartaata piviusulersaarusiaanut aningaasaliiffigineqarpoq
  • Qaammatinut sisamanut Inuuteq Akvilas Storchip assilissanik atuakkiaanut, ullutsinni Sisimiut assitigut takutitsisussamut, aningaasaliiffigineqarpoq
  • Qaammatinut sisamanut Terto Edele Ngiviup qanga kalaallit ileqquinut misissuinermut, kingornalu Kalaallit Nunaata sineriaanut meeqqat atuarfiinut ilinniarfeqarfinnullu saqqummiussassaanut, aningaasaliissutigineqarput
  • Qaammammut ataatsimut Josef Lund Josefsenimut, Nick Poulsenimut, Nina Kreutzmann Jørgensenimut aamma Rene Brandt Løvstrømimut peqatigiillutik Josefip Nickillu tusarnaartitsisaqattaarnissaannut piareersaqatigiinnissaannut aningaasaliiffigineqarput.
Kulturimik sulialinnut aningaasaliissutinut akissarsiutigalugu eqqumiitsuliortut pinngorartitsisullu Kalaallit Nunaanni najugaqavissut qinnuteqarsinnaapput. Legatit, nalinginnaasumik ukioq ataaseq angullugu agguaanneqarsinnaasut, qaammatikkaartumik akileraannginnermi 22.000 koruunninngorlugit agguaanneqartarput. Ukioq manna 1,2 mio. koruunnit kulturimik sulialinnut aningaasaliissutinik immikkoortitsisoqarpoq. Kingusinnerpaamik qinnuteqarfissat ulluliussaapput 15. januar, 1. maj aamma 1. september, qinnuteqarnerit elektroniskimik www.sullissivik.gl –kkut pisarput.

Kulturimik sulialinnut aningaasaliissutinik agguaassineq siulleq ukiup siulianut sanilliullugu siusinneruvoq. Siuliatigut pinnattussat kingusinnerpaamik qinnuteqarfiup ulluata kingorna sapaatit akunneri arfineq pingasut tikillugit aningaasarsiassatit utaqqisariaqartarnikuuaat. Taamaakkaluartoq eqqumiitsuliortut arlallit agguaassisarneq siusinnerusukkut pisarnissaa kissaatiginikuuaat, ukiumi siusissukkut pilersaarutiminnik suliaqartut iluaqusertassammagit. Tamanna pillugu Naalakkersuisoq aalajangernikuuvoq qinnuteqarfissap ullua siulleq 15. januarimut nuutinniarlugu. Maannakkut eqqumiitsuliortunut ajornarunnaarnikuuvoq kulturimik sulialinnut aningaasaliissutit siulliit februaarip aallartilaarnerani aningaasarsinissaq.
Namminersorlutik Oqartussanit kultureqarnermut aningaasaliissutit allat tassaapput Kultureqarnermut aningaasaliissutit, Filmiliorneq kiisalu kalaallit oqaasii atorlugit atuakkiat imatut qinnuteqaateqarnermut killiligaasut, 1. februar, 1. maj aamma 1. september.

Kulturimut tunngasunik suliaqarnermut aningaasaliissutit taamatullu tapiissutaasartut allat pillugit paasissutissat uani atuarneqarsinnaapput www.sullissivik.gl

Namminersorlutik Oqartussat kulturimut tunngasunik suliaqarnermut aningaasaliissutigisartagaat paasisaqarfiginerorusukkukkit attaveqarfigissavat:

Ilinniartitaanermut, Kultureqarnermut Ilageeqarnermullu Naalakkersuisoqarfik, Uiloq Mathæussen, Toqq/direkte 345741, uilm@nanoq.gl imaluunniit Mika Lyberth, Toqq/direkte 345744, mlyb@nanoq gl