Ilinniartitaanermut Naalakkersuisup Ane Lone Bagger-ip Savalimmiuni Vinnuháskúlin pulaarpaa

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisup Ane Lone Bagger-ip piffissami matumani immikkut sammivai Imarsiornermik Ilinniartitaanerit, nuannaarutigalugulu nunatsinni imarsiornermik ilinniartitaanernut tunngatillugu suleqatigiinneq pilersinneqartoq Imarsiornermik Ilinniarfiup, Imarsiornermik Aalisarnermillu Inuussutissarsiortut kiisalu Ilinniartitaanermut Naalakkersuisoqarfiup akornanni. Tamatumunngalu tunuliaqutaavoq, kilisaataatillit akornanni aammalu naalakkersuinermik suliaqartut akornanni imarsiornermik inuussutissarsiutinut aqumiunik ilinniartitsineq annertuumik soqutigineqarmat.

Tamannalu tunuliaqutaralugu Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisup Ane Lone Bagger-ip Savalimmiuni allamut tunngasumik ataatsimiigiarnerminut atatillugu kissaatigisimavaa imarsiornermut maskinistinullu Søfarts- aamma maskinistskolen, Vinnuháskúlin-imi Tórshavn-imiittoq pulaassallugu. Ane Lone Bagger-ip Imarsiornermut maskinistinullu ilinniarfik tallimanngorneq Vinnuháskúlin-imi Tórshavn-imiittoq 31.januar pulaarpaa.

Ilinniarfimmi rektori Wilhelm Petersen Naalakkersuisumik tikilluaqqusivoq saqqummiussillunilu ilinniarfimmut aammalu Savalimmiuni imarsiornermut ilinniartitaanernut tunngasunik. Ilinniarfik ukiut kingullit arfinillit ingerlaneranni naalagassanik, umiarsuarni naalagassanik, maskinistinik kiisalu maskinmesterinik 500-nit amerlanerusunik ilinniagaqartitsisimavoq.

Qaffasissumik ilinniagaqarsimallutik piumaneqaqisunillu ilinniarsimanerminnut uppernarsaateqarlutik ilinniarfimmi Vinnuháskúlin-imi ilinniagaqarsimasut nunarsuata imavissuini tamani tamaani sullipput. Ilinniarfimmi imarsiornermut pikkorissartitsinerit assigiinngitsut amerlasuut ingerlanneqartarput, imarsiortunik fagitigut piginnaanernik pigisassanik nutaanerpaanik imarsiornermullu atatillugu malittarisassanik assigiinngitsunik malinnaatitsisunik.

”Nuannaartunarpoq takullugu qanoq Savalimmiormiut inuiaqatigiittut imarsiornermik ilinniarfimmik ineriartortitsisimaneri, inuiaqatigiinnut tamarmiusunut iluaqutaalluartumik. Ilinniarfimmit naammassillutik sulilertarput imarsiortut amerlasuut, uagullu nunatsinni suliaat pitsaasunik isumassarsiorfigisinnaavagut, uagut Imarsiornermik Ilinniarfitsinnik ineriartortiteqqinnissatsinni” – taama nalunaarpoq Naalakkersuisoq, Ane Lone Bagger.

Annertunerusunik paasisaqarumagaanni attavigineqarsinnaavoq: Sigvard Fleischer, +299345000