Meeqqat atugarissaarnerulernissaannut pitsaanerusumillu ineriartornissaannut misiliummik suliniuteqarnissamik isumaqatigiissut aallarniutaasoq

Februaarip 10-ani 2020-mi, Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen aammalu Avannaata Kommuniani borgmesteri Palle Jerimiassen misiliummik suliniutissaq Meeqqat 0-18 pillugu suleqatigiinnissamik isumaqatigiissummik atsioqatigiipput.

 

Meeqqat pillugit ilisimasat meeqqerisunit sulisunut ulluunerani neqeroorutiniittunut ingerlateqqinneqartarnissaat qanoq qulakkeerneqassava? Qanoq meeqqat nunaqarfimmi atuarfimmiit illoqarfimmi atuarfimmut ikaarsaarnissaat toqqissisimanartunngortinneqassava? Meeqqat akornannit paarinerlunneqarnermik ersiutinik kigutileriffimmit nalaassisoqarpat, taava paasisat kikkunnut ingerlatinneqassappat?  Taakku attaveqaatit tamarmik allarpassuarnullu tunngasut, meeqqat inuusuttullu ukioqannginnerminniit 18-iliinissaasa tungaanut attuumassuteqarfigisartagaat, suliniummi Meeqqat 0-18-imi ataqatigiissaarneqartassapput. Suliniut pillugu ukiunik marlunnik atuuttussamik Pitsaaliuinermut Isumaginninnermullu Aqutsisoqarfik Avannaata Kommunianut suleqatigiinnissamik isumaqatigiissuteqarpoq. 

Suleqatigiissutissap siunertaa tassaavoq, Meeqqat 0-18-ip pingaarnertut anguniagassaa: Meeqqat inuusuttullu ukioqanngitsunit 18-inik ukiullit tamarmik atugarissaarlutik ineriartorlutillu pitsaasumik inuuneqassaat, pillugu suliniutit attuumassuteqartut ineriartortinnissaat atulersinneqarnissaallu.

 

Meeqqat inuusuttullu atugaasa pitsanngorsarnissaannut suliaqarnermi, suliniut Meeqqat 0-18 qitiulluinnartumik inissisimavoq. Oqartussaaffiit assigiinngitsut akornanni, meeqqat inuunerminni ikaarsaariarnerminni assigiinngitsuni suliatigut maanngannartinneqannginnissaat pingaaruteqarpoq. Meeqqat inuusuttullu ukioqannginnerminniit 18-it tungaanut ukioqalernissaasa tungaanut ajornanngitsumik inuunerminni ikaarsaartarnissaat, aammalu meeqqat inuusuttullu pillugit paasissutissat oqartussaasoqarfiit assigiinngitsunik suliallit akornanni annaaneqannginnissaat Meeqqat 0-18-imit qulakkeerneqassaaq. Suliniutissap ineriartortinnissaanut atuutsilernissaanullu Avannaata Kommunia suleqataarusummat qujaffigaara. Nunap sinnerani Meeqqat 0-18-ip atuutsilernissaanut suleqatigiinnissaq aallarniutaavoq pingaaruteqartoq” Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

 

Suliniummi meeqqat atugarissaarnissaat ineriartortinneqarnissaallu pillugit suliassaqarfiit assigiinngitsut suleqatigiinnerisa nukittorsarneqarnissaat ataqatigiissaarneqarnissaallu suliniutigineqassaaq. Meeqqat ataasiakkaat pillugit ilisimasat pisortat oqartussaasullu akornanni ingerlatinneqarnerini annaaneqannginnissaannut qulakkeerinnittumik aaqqissuussinissaq qitiutinneqassaaq. Ataqatigiissaakkamik aaqqissuussinikkut suleqatigiinnikkullu meeqqat pillugit ilisimasat ataatsimoortillugit pigineqalissapput, taamaalilluni siusissukkut suliniutissat aallartinneqarsinnaalissallutik. Avannaata Kommuniani atuutsitsilernissamit misilittagariligassat tunngavigalugit piffissap ingerlanerani suliniut nunap sinneranut kommunit sinnerini ingerlanneqalernissaa siunertaavoq.

 

Attaveqarfissaq

Paasisaqarnerorusukkuit naalakkersuisup allattaa Inger Heilmann Larsen e-mailikkut: ihla@nanoq.gl imaluunniit oqaras. +299 554160-mut attavigiuk