Aasaanerani Arctic Umiaq Line A/S-imi soraarnerussutisialinnut akikillisaatit

2020-mut Aningaasanut Inatsimmut isumaqatigiissutip akuersissutigineqarnera tunngavigalugu Ineqarnermut Attaveqaqatigiinnermullu Naalakkersuisoqarfik Arctic Umiaq Line A/S-ilu 2020-mi aasaanerani soraarnerussutisiallit aamma siusinaarlutik soraarnerussutisiallit Sarfaq Ittuk-mi ilaaffissani ammaannartuni 25%-inik akikillisaanneqarnissamut neqerooruteqarfigineqaqqissinnaanerinik isumaqatigiissute-qarput.

 

Ilaasussat soraarnerussutisiallit, siusinaarlutillu soraarnerussutisiallit,  akimik tamakkiisu-mik atuillutik bilitsisereersimasut, akit assigiinngissutaat Arctic Umiaq Line A/S-imit, utertinneqassapput, tamanna pillugu Arctic Umiaq Line A/S-imut saaffiginnissuteqar-toqarsinnaavoq.

 

Ineqarnermut Attaveqaqatigiinnermullu Naalakkersuisoq Karl Frederik Danielsen ima oqaaseqarpoq:

”Soraarnerussutisiallit, aamma siusinaartumik soraarnerussutisiallit, Sarfaq Ittuk-mut ilaallutik angalanerini atugassarititaasut pitsanngorsarneqarnissaat, ilaatigut aasaanerani ilaaffissani ammaannartuni 25%-inik akikillisaanneqartalernissaat pillugu Naalakkersuisut  siunnersuutaat Inatsisartuni tapersersorneqarmat nuannaarutigisorujussuuara.

 

Aammattaaq Arctic Umiaq Line A/S-ip sinerissami ilaasunik angallassinerani suleqatigiinnerup pitsaasumik tatiginniffiusumillu ingerlanneqarnera, aammalu angalasunut atugassarititaasut pitsanngorsartuarniarlugit umiarsuaatileqatigiiffiup suleqatigineqarnera nuannaarutigisorujussuuara.”

 

Annertunerusumik paasissaqarusunnermi Naalakkersuisup allattaa Anders Samuelsen ansa@nanoq.gl, mobil: 290320 saaffigineqarsinnaavoq.