Kim Kielsenip Kalaallit Nunaata uuliaqarsinnaanerata ussassaarutiginissaa aallartippaa

Naalakkersuisut siulittaasuata Kim Kielsenip Kalaallit Nunaanni sumiiffiit pillugit akuersissutit nutaat saqqummiunneqartut sap. ak. 6-imi Houstonimi ussassaarutigiartorpai. Ussassaariartortut akornanni Naalakkersuisut siulittaasuata Naalakkersuisoqarfiani aamma Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfimmi atorfilittat peqataapput.

Uuliasiornermik ingerlatseqatigiiffinnut Kalaallit Nunaat pillugu 5. februar 2020-imi immikkut saqqummiineq (https://www.aipn.org/forms/meeting/Microsite/US5Feb2020) Naalakkersuisut siulitaasuata ammarpaa. Saqqummiineq Association for International Petroleum Negotiators peqatigalugit piviusunngortinneqarpoq.

Saqqummiinermi nunatta immikkoortuini geologi, nunatta uuliaqarsinnaaneranut misissuinerit nutaat kiisalu tunngavissatut inatsisit piumasaqaatillu, matumani sumiiffinnut qinnuteqarnissamut piffissaliussat, qinnuteqarnissamut piumasaqaatit, akuersissutinut maleruagassat, avatangiisinut isumannaallisaanermullu pissutsit allallu ilanngullugit sammineqarput.

Saqqummiinermi geologimut tunngasut Danmarkip Kalaallit Nunaatalu Geologimut tunngasunik misissuisartuinit (GEUS) saqqummiunneqarput.

Naalakkersuisut siulittaasuat Kim Kielsen oqarpoq: ”Kalaallit Nunaanni sumiiffinni tamani atuakkat pitsanngorsarneqarniassammata Kalaallit Nunaata isertitaqarnerulernissaanut Naalakkersuisut periarfissarsiortuarnissaat pingaaruteqarpoq.”

Kim Kielsenip erseqqissaatigaa: “Nunat tamalaat nunarsuup silaannaanut atatillugu anguniagaat Kalaallit Nunaata tapersersorpai, matumani CO2-mik aniatitsinnginnerunissaq ilanngullugu. Peqatigisaanillu oqaatigisariaqarparput uuliap piumaneqarnerata ukiuni tulliuttuni annertusiartornissaa naatsorsuutigineqartoq. Nunarsuarmi nukissiuutit amerlasuut uulianit gassinillu atuitillugit Kalaallit Nunaat allatulli uulianik gassinillu piiaasinnaavoq avammullu tuniniaasinnaalluni. Soorunami nunani tamalaani piumasaqaatit qaffasinnerpat naapertorlugit nunatsinni uuliasiortoqassaaq”.

Kalaallit Nunaata uuliaqarsinnaanera pillugu ussassaarinerup assinganik Londonimi 10. februar saqqummeeqqittoqassaaq.

Apeqqutissaqaruit Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfik attavigiuk, isiin@nanoq.gl imaluunniit telefon 34 50 00.