Naalagaaffeqatigiit 2020-mi Nunat Avannarliit Ministeriisa Siunnersuisoqatigiiffianni siulittaasuunerminni siullermeertumik ataatsimiinnerat

Nunani Avannarlerni suleqatigiinnermut Naalakkersuisoq Ane Lone Bagger nunani avannarlerni ministerit allat Københavnimi 4. februar 2020-mi siullermeertumik ataatsimeeqatigivai, matumani nunat avannarliit suleqatigiinnerannut takorluugaq nutaaq, 2030-mut Takorluugaq, pingaarnertut sammineqarluni.

Nunani avannarlerni naalakkersuisut siulittaasuisa, tassunga ilanngullugu Naalakkersuisup Kim Kielsenip, 2019-imi augustimi nunani avannarlerni suleqatigiinnermut takorluugaq nutaaq, 2030-mut Takorluugaq, tassa Nunat Avannarliit nunarsuarmi piujuartitsinerpaanissaat peqataatitsinerpaanissaallu aalajangiuppaat. Ullormut oqaluuserisassani piujuartitsinermut tunngaveqarnerulernissaq pingaartumik isiginiarneqarsimavoq.

Tamanna tunngavigalugu suleqatigiinnermut ministerit 4. februar 2020-mi pingaarnertut anguniagassat aqqaneq-marluk, Nunat Avannarliit Ministeriisa Siunnersuisoqatigiiffiata piffissami 2021-24-mi suliaannut aqutsisuusussat akuerivaat. 2030-mut takorluukkamut nutaamut nutaamik eqqarsarnissaq pisariaqarpoq. Iliuusissatut pilersaarummik suliaqarneq Nunat Avannarliit Ministeriisa Siunnersuisooqatigiivisa takorluukkamik siuarsaaniarnerannut iluaqusiisoq aqqutigalugu nunani avannarlerni suleqatigiinnermi sutigut tamatigut takorluukkap ilanngunneqarnissaa pingaarnerpaatinneqarpoq.

Nunani Avannarlerni suleqatigiinnermut Naalakkersuisup Ane Lone Baggerip Nunani Avannarlerni silap pissusaanut suliniutit isiginiarneqarnerujussuat pingaartumik nuannaarutigaa. "Tassunga atatillugu takorluukkami anguniakkat silap pissusaanut naleqqussarnissamut suliniutinik ilaqarnerat nuannaarutigaarput, tassami silap pissusaata allanngoriartornera Issittumi malugineqarnerpaavoq, taamaattumillu pinngortitap atugassaritiligaanut naleqqussarnissarput aqqutissiortariaqarparput" Ane Lone Bagger oqarpoq.

Suleqatigiinnermut ministerit ataatsimiinnerini 2030-mut Takorluukkamut atatillugu Nunani Avannarlerni inuiaqatigiinni piujuartitsinissamut anguniakkami naligiissitaanerup isiginiarneqarsimanera Ane Lone Baggerip aamma uparuarpaa.

”Suiaassutsini naligiissitaaneq tassaavoq suliassaqarfinni pingaarutilinni angutit arnallu naligiimmik pisussaatitaaffeqarnerat, pisinnaatitaaffeqarnerat periarfissaqarnerallu. Matumani ilaatigut nunaqarfinni inuiaqatigiinnilu isorliunerusuniittuni angutit amerlanertigut suliffeqanngitsut, ilinniakkamik amigaatillit, inooriaasertik pissutigalugu nappaatiminnik naalliuutillit attaveqaqatigisartagassaminnillu amigaatillit suli amerliartuinnarput". Ane Lone Bagger isumaqarportaaq inuiaqatigiinnitsinni angutit immikkoortitaasartut isiginiarneqartariaqartut.

Nunat Avannarliit Ministeriisa Siunnersuisoqatigiiffianni killeqarfitsigut aporfissat pillugit suliat, nunani avannarlerni innuttaasut nunat avannarliit akornanni inuunissaannut ajornannginnerulersitsisussat Kalaallit Nunaata tapersersorpai. Ane Lone Baggerip assersuutigalugu uparuarpaa Nunat avannarliit akornanni ilinniarfitta akuersaarneqarnissaata isiginiarneqarnerat pitsaasuusoq, tassa imaappoq Kalaallit Nunaanni ilinniarfimmi ilinniarsimasoq ilinniakkaminik nunani avannarlerni allani atuisinnaajumaartoq.

Naalakkersuisup Ane Lone Baggerip nunani avannarlerni allani kalaallit ilinniartut atorfinitsinniarneqartarnerannut tunngatillugu nunani aporfeqarnersoq misissorusuppaattaaq, suliniut inuusuttortatta suliffimmik misiliiffissaqarsinnaanissaanut iluaqutaasussaq.

Ane Lone Baggerip oqaatigaa:
”Nunat avannarliit suleqatigiinnerisigut pingaartumik ilinniartitaanermut tunngasuni pissarsiaqarnerusinnaanitsinnut periarfissatsialaat takusinnaavakka. Inuusuttortatta ilinniarnerminnik imaluunniit suliffimmik misiliinerminnik Danmarkimiinnaanngitsoq nunanili avannarlerni allani aammalu Nunani Avannarlerni nunat immikkoortuini uagutsinnut assersuunneqarluarsinnaasuni naammassinnissinnaanerannut periarfissatsialaqarnera matumani pivara. Periarfissat taakkua isiginiarneqarnerunissaat qilanaaraara"

Naalagaaffeqatigiit, Kalaallit Nunaat, Savalimmiut Danmarkilu 2020-mi Nunat Avannarliit Ministeriisa Siunnersuisoqatigiiffianni siulittaasuussapput, taamaattumillu ukiup ingerlanerani Kalaallit Nunaat nunani avannarlerni ataatsimiinnernut arlalinnut, tassunga ilanngullugu Ilulissani suleqatigiinnermut ministerit ataatsimiinnissaannik pilersaarutaareersumik aamma aqutsisuusussaavoq.

Paasisaqarnerorusukkuit Naalakkersuisumut allatsi Rosa Thorsen attavigiuk, +299 553303, rosath@nanoq.gl.