Brexitip nunatta tuluillu kunngeqarfiata akornanni pissutsit 2020-mi allanngortinnavianngilai

Ukiut pingasut Brexitimut isumaqatigiinniartoqareersoq, Tuluit Kunngeqarfiat/United Kingdom, UK, Europamiut Unioniannit 31. januar 2020 anillappoq. Tamatuma kingorna aninermik ikaarsaariarnermi piffissaq aallaaviusumik 31. december 2020 tungaanut atuutissaaq.

 

Taamaammat Naalakkersuisut, Kalaallit Nunaanni tamanut ilisimatitsissutigissavaat, ikaarsaariarnermi piffissami tassa ukiup 2020 sinneranut atuuttussami EU-p inatsisai maleruagassaallu suli UK-mut atuutissammata. Tamanna isumaqarpoq UK 2020 tamaat EU-p niueqatigiiffiani, EU-p akitsuusersuiviani aammalu EU-p aningaasatigut missingersuussiviani tapeeqataassammat.

 

EU UK-lu ukiut kingulliit avissaarnissartik pillugu isumaqatigiinniarsimapput, 2020-milu siunissami qanoq suleqatigiinnissaq isumaqatigiinniutigineqassaaq. Tamatumani ilaatigut aalisarneq niueqatigiinnerlu eqqartorneqassapput. 2020-mi ikaarsaariarnermi piffissaq siunertarissavaa Tuluit Kunngeqarfiata EU-llu siunissami qanoq suleqatigiinnissaat pillugu isumaqatigiinniarnissaminnut piffissaqarnissaat. Piffissami tassani illuatungeriit Brexitip kingorna pisussat piareersassavaat.

 

Kalaallit Nunaata UK-mut suleqatigiinnermik sinaakkutit maannamut UK-p EU-mi ilaasortaaneranik tunngaveqarput. Imaappoq Kalaallit Nunaanut niuernikkut, aalisarnikkut kiisalu angallannikkut EU-p inatsisai maleruagassaallu atuupput.

 

  • Taamaattumik kalaallit niuernikkut sinaakkutaat UK-mut atugassaat, soorlu nioqqutissanik eqqussisinnaaneq aammalu uumasut nakorsaata kalaallit niuerutaannut malitassatut atuutsitai UK-mut 2020-mi atuutiinnassapput.

  • Aalisarneq pillugu EU-mik suleqateqarnermi, UK-mut tunngasoq aamma 2020-mi ingerlaannassaaq.

  • Kalaallit Nunaanni innuttaasut UK-mut  angalasinnaanerat kiisalu UK-mi innuttaasut Kalallit Nunaannut angalasinnaanerat 2020-mi aamma allannguuteqassanngillat.

     

    Ilinniartitaanermut Kultureqarnermut, Ilageeqarnermut kiisalu Nunanut Allanut Naalakkersuisup oqaatigaa:

     

    ”Kallallit Nunaanni innuttaasut, suleqatigiiffiit, suliffeqarfiillu maannamut inatsisitigut suleqatigiinnikkullu Tuluit Kunngeqarfianni, UK-mi innuttaasunik suleqatigiiffinnik suliffeqarfinnillu 2020-mi maannamut ingerlanerit atuutiinnassapput, naak UK EU-mit anigaluartoq. Naalakkersuisunit Kalaallit Nunaata UK-llu akornanni isumaqatigiissutissat nutaat ataavartut Brexit-ip atuutilernerani inissikkumaarnissaat sulissutigisarput ingerlatissavarput.”

     

    Annertunerusumik paasisaqarusukkuit  Mininnguaq Kleist, Kalaallit Nunaata Bruxelles-mi sinniisoqarfiani attavigisinnaavat. Telefon: +32 499 99 58. E-mail mikl@nanoq.gl