Naalakkersuisut 2020 – 2024-imut uuliasiornermut gassisiornermullu periusissiaq nutaaq akueraat

Råstof

Periusissiami aallunneqartoq pingaarneq tassaavoq, Kalaallit Nunaanni uuliasiorluni gassisiorlunilu misissuinissamut soqutiginnilersitseqqinnissaq. Killiffik tassaavoq, ullumikkut misissuinissamut aammalu qalluinissamut akuersissutit sisamaasut, kisianni sanilliukkaanni assersuutigalugu 2014-imi misissuinissamut aamma qalluinissamut akuersissutit 20-init amerlanerullutik – taakkua ukiut ingerlaneranni 2018 tikillugu utertinneqareerlutik/utertinneqaleruttorlutik.

Periusissiami aqqutissat makkua tunngavigineqarput:

  • Sumiiffinnik pisinnaatitsissuteqarfinnik nutaanik ammaaneq (nunami taamatullu sinerissap avataani), takuuk takussutissiaq matuma kingulianiittoq.  
  • Nunap sannaanut aammalu geofysiskinut suliniutinik pisinnaatitsissutinut politikkimut akuusutut ilaatillugu ingerlatsinissaq.
  • Uuliasiornermut suliffissuarnut iliuuseqarluni nittarsaassilluni suliniuteqarneq.
  • Atugassarititaasunut killissaliussanik naleqqussaaneq, ilanngullugu ’first-mover’-nut aaqqissuussineq nutaaq, periusissiap atuuffissaani atuuttussaq, naapertorlugu akileraarusiisarnerup annertussusaanik immikkut naleqqussaanissaq.   

Takussutissiaq 1 Pisinnaatitsissuteqarfinnik ammaanissamut pilersaarut

Nunap immikkoortua (sumiiffik)

Ammarneqarnissaa pilersaarutigineqarpoq

Nunami Nuussuaq bassinet / Qeqertarsuup Kitaa

Februar 2020

Ikersuaq Davis

September 2020

Baffinip Kangerliumarnga

September 2020

Nuussuaq bassinet / Qeqertarsuup Kitaa

September 2020

Kalaallit Nunaata avannaarsua

Juli 2021

Tunup qiterpasissortaa

Januar 2022

Periusissiaq ilaatigut tusarniaanermut akissuteqaatit, tamanut tusarniaanermut piffissami 2019-imi maajip 23-aniit aggustip 31-anut ingerlanneqartumut atatillugu tiguneqartut tunngavigalugit suliarineqarpoq, tassani avataaneersunit tusarniaanermut akissuteqaatit arfineq pingasut tiguneqarput.  Tusarniaanermut akissuteqaatit attuumassuteqarneri malillugit ilanngunneqarput.

Periusissiaq Inatsisartunut ilaasortanut aamma Inatsisartut Inuussutissarsiornermut Aatsitassanullu Ataatsimiititaliaanut agguaanneqassaaq.

Apeqqutissaqaraanni saaffigineqassaaq Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfik isiin@nanoq.gl imaluunniit oqarasuaammut 34 50 00.