Nunani allamiinnermut tapiiffigineqarsinnaaneq

Paarlaasseqatigiilluni nunani allamiinnermut tapiiffigineqarsinnaaneq pillugu nalunaarut 1. januar 2020-imi atuutilersoq Naalakkersuisut akueraat. Tamatuma kingunerisaanik inuusuttut 15-it 17-illu akornanni ukiullit Kalaallit Nunaata Danmarkillu avataani paarlaasseqatigiilluni nunani allamiinnissaminnut tapiiffigineqarnissamik qinnuteqarsinnaalerput. Nalunaarut nutaaq aqqutigalugu paarlaasseqatigiilluni angalanissanut tapiiffigineqarsinnaanissamut pitsaanerusumik periarfissaqalersitsivoq  - pingaartumik ilaqutariinnut tapiiffigineqarnissamik pisariaqartitsisunut.

Inuusuttortagut oqaatsinik kulturinillu allanik ilinniariartorlutik nunanut allanut angalasinnaanissartik toqqarsinnaalerpaat. Kalaallit Nunaata Danmarkillu avataani najugaqarallarneq inuttut ineriartornermut ilinniaqqinnissamullu iluaqutaassaartaaq. Qularnanngitsumik misigisaqarluassapput, ilisimasaqarnerulissapput nunat allat kulturiinik, ileqquinik, ileqqutoqaanik ilikkagaqassapput nunallu tamalaat kulturii eqqarsaatigalugit naleqarluartunik piginnaasaqalissallutik”, taamak oqarpoq Ilinniartitaanermut Naalakkersuisoq, Ane Lone Bagger.

 

Inuusuttut paarlaasseqatigiilluni nunani allamiinnerat paarlaasseqatigiilluni nunani allaniititsisanernik aaqqissuussisartunit Ilinniartitaanermut Naalakkersuisoqarfimmit akuerineqarsimasunit aaqqissuunneqartassapput.

 

Tapiiffigineqarsinnaanissamut maleruagassat Sullissivimmi ’Inuusuttut paarlaasseqatigiilluni nunani allaniinnerinut tapiissutit’ ataani atuarneqarsinnaapput.

 

Paarlaasseqatigiilluni nunani allamiinnernut tapiissutit pillugit annertunerusumik paasisaqarusuttut Ilinniartitaanermut Aqutsisoqarfimmi efterskolertitsinermut allaffimmut saaffiginnissinnaapput oqarasuaat 34 50 00 imaluunniit e-mail: efterskole@nanoq.gl aqqutigalugit.