Soraarnerussutisiaqalernissamut aaqqissuussinermut peqataasussaatitaanermut tunngatillugu neqerooruteqartitsinermi SISA ajugaasuuvoq

Soraarnerussutisiaqalernissamut aaqqissuussinermut peqataasussaatitaanerup Nam­minersorlutik Oqartussat sinnerlugit kimit isumagineqarnissaa pillugu neqerooruteqar­tit­sinermi Sulinermik Inuussutissarsiuteqartut Soraarnerussutisiaqalernissamut Ani­ngaa­­saateqarfiat (SISA) ajugaasuuvoq. Suliassamut ataaseq neqerooruteqartuuvoq. Isu­ma­qatigiissut 29. januar 2020-mi atsiorneqarpoq.

Akileraartarnermut Aqutsisoqarfiup, suliassap ingerlatseqatigiiffimmit kimit isumagi­neqar­nis­­saa pillugu aalajangiiniarnermini Willis Towers Watson siunersioqatigaa.

 

Soorlu 10. december 2019-imi Namminersorlutik Oqartussat Neqerooruteqartitsi­ner­mut isaaffiani kiisalu avisimi Sermitsiami naqitami saqqummiunneqareersoq, soraar­ne­russutisiaqalernissamut aaqqissuussinermut peqataasussaatitaanermik isumagin­nit­tuu­nissaq pillugu neqerooruteqartitsineq Akileraartarnermut Aqutsisoqarfiup Nammi­ner­sorlutik Oqartussat sinnerlugit ingerlappaa.

 

Neqerooruteqartitsineq Pisortat oqartussaaffigisaanni suliffeqarfiinilu nioqqutissanik kiffartuussinernillu pisiniarnermut tunngatillugu neqerooruteqartitsisarneq pillugu Inatsisartut inatsisaat nr. 6, 12. juni 2019-imeersoq malillugu ”tamanut ammasumik neqerooruteqartitsineq”-tut ingerlanneqarpoq.

 

PAASISSUTISSAT: Isumaqatigiissutip pingaarnertut makku imarai:

 

  • Aaqqissuussinermik pilersitsineq pisassaaq Akileraartarnermut Aqutsisoqarfiup aningaasanik SISA-mut nuussinerini
  • Pilersitsineq peqqissutsimut paasissutissanik tunniusseqqaarani pisassaaq
  • Aaqqissuussineq sillimmasiinermut soraarnerussutisiaqarnermullu tunngasunik ukuninnga imaqarpoq:
    • Soraarnerussutisiassat toqussaq tikillugu tunniunneqartarnissaat
    • Sivikinnerpaamik ukiuni 10-ni tunniunneqartarnissaannik qulakkee­ri­neq
    • Ileqqaakkat piffissami ileqqaarfiusumi katersatut qulakkeerneqarnerat
    • Aaqqissuussinerup niuerfinni erniarititaasut tunngavigai, tassa ileqqaakkat SISA-mit aningaasaliissutigineqarnerisigut iluanaarutit katersanut ataasiakkaa­nut ullut tamaasa nuunneqartarlutik. Aningaasaliisarnerit marlunnut aggua­gaap­put, Annertusiartortitsineq aamma Aalaakkaasoq, aamma sillimmasertit­tut / kontumik piginnittut ataasiakkaat katersaat SISA-p aningaasaliisarnernut taakkununnga marluusunut agguartarpai, inuup qassinik ukioqarnera apeqqu­taa­tillugu.

 

Aaqqissuussineq pillugu paasissutissanik sukumiinerusunik perusukkaanni SISA-p inter­net­ikkut nittartagaa innersuunneqarpoq, takuuk https://sisa.gl/pensiuuni/soraarnerussutisiaqalernissamut-aaqqissuussinermut-peqataasussaatitaaneq-akileraartarnermut-aqutsisoqarfimmit-akileqquneqartut/

 

Soraarnerussutisiaqalernissamut aaqqissuussineq ukuninnga aningaasartuutitaqassaaq:

 

Akiliutit isumagineqarnerinut aningaasartuutit – Akiliutit tamarmik 5%-imik ilanngar­ne­qar­tassapput, kisianni ileqqaakkanik/katersanik soraarnerussutisiaqalernissamut aaq­qis­suussinernit allaneersunik nuussinerit pinnagit.

 

Katersat isumagineqarnerinut aningaasartuutit – Qaammatikkaartumik ilanngaatigine­qar­tassapput:

  • Ilaasortanut akiliuteqartartunut 13,25 kr.
  • Ilaasortanut akiliuteqartarnerminnik uninngatitsigallartunut 4,50 kr.
  • Soraarnerussutisialinnut 13,25 kr.

 

Katersat aningaasartuutinik allanik ilanngarneqartassanngillat.

 

Akiliisitsissutit – SISA-p akiliisitsissutigisagaa ataasiinnaavoq, tassa soraarnerussutisia­qa­ler­nis­samut aaqqissuussinerup maanaannaq unitsitsinneqarnerani aamma SISA-miit soraarnerussutisisaqalernissamut aaqqissuussivimmut allamut nuunneqarnerani akilii­sit­sissut. Akiliisitsissut taanna 2020-mi 1.500. kr.-uvoq.

 

Aningaasaliisarnermi aningaasartuutit, ukiumut aningaasartuutitut procentinngorlugit (ÅOP)  – 2019-imi ukiumut aningaasartuutit tamakkerlugit procentinngorlugit (ÅOP) An­nertusiartortitsineq-mut tunngatillugu 0,33%-iusimapput Aalaakkaasoq-mullu tun­nga­tillugu 0,47%-iusimallutik. Taakku aaqqissuussivimmut avataaniittumut aningaasar­tuu­tinut kiisalu SISA-p aningaasaliisarnermik ingerlataqarnerminut atatillugu nammi­neq allaffissornermut aningaasartuutaanut matussutaapput.

 

Soraarnerussutisiaqalernissamut aaqqissuussinerup iluanaarutai:

SISA-p aningaasaliisarnermini niuerfiit erniarititaasigut qaammatini 36-ni kingullerni iluanaarutigisimasai:

 

Annertusiartortitsineq  – 19,68%

Aalaakkaasoq  –   9,76%

 

 

 

Tusagassiorfiit saaffiginninneranni attavissaq / Akileraartarnermut Aqutsiso­qar­fik

pension@nanoq.gl

Tlf. 346579