Kalaallit Odensemi katsorsartipput

 

Aningaasanoornermik pinngitsuuisinnaajunnaarneq akisusinnaavoq. Ilaquttanik attaveerunnermik kinguneqarsinnaavoq. Imaluunniit pigisanik nalilinnik soorlu umiatsiamik illumilluunniit akeqarsinnaalluni.

 

Inuit ilaannut aningaasanoorusunneq imaappoq pinnguarusussuseqarneq. Ilaqarpugut nittartakkakkut odds-erlutik aningaasanoortartunik, katersortarfimmut bingoriartartunik sutorniartarfinnulluunniit automateriartartunik. Taamaattumik aningaasanik atuilluni pinnguarusussuseq ulluinnarsiutaavoq, pissanganarmat aningaasarpassuarnillu iluanaarutaasinnaalluni, tamatiguunngitsorli.

 

Allorfiup Center for Ludomani Odensemiittoq kalaallinik aningaasanoornermik pin-ngitsuuisinnaajunnaarnikunik katsorsaanermini suleqatigilluarpaa. Inuit arfineq-marluk, 28-niit 60-inut ukiullit, Allorfimmiillu katsorsaasut marluk, ulluni aqqaneq - marlunni Odensemeeqqammerput katsorsaanissaq katsorsartinnissarlu siunertaralugit.

 

Ikiorneqarsinnaaneq

Taatsi Magnussen 28-inik ukioqarpoq, taassuma ukiut marluk matuma siorna oddsertarnermi kingorna aningaasanik atuivallaarnini ajornartorsiutigilersimavaa.

”Katsorsartissimanera tulluusimaarutigaara nalunnginnakku uannut iluaqutaasoq,” Taatsi Magnussen oqarpoq.

 

Sapaatip akunnera siulleq eqqarsartaatsimigut sakkortunaarlugu imminut aperisariaqarsimavoq: Sooruna spillertarsimasugut? Assagut isugutattut pissangalluta,”

Taatsip aamma oqaatigaa katsorsartinnermi nalaani spillerusuttarsimagaluaqaluni, taamaattorli katsorsaavimmiinnerminni aningaasanoorajuttuusimasumik ani-ngaasanoorajukkunnaarlunilu inuunerup qanoq innera pillugu saqqummiisoqareernerata kingorna aningaasanoorusussuseerussimalluni.

”Kisimiinnanga paasillugu eqqissiallannarpoq”, Taatsi Magnussen naggasiivoq.

 

Peqataasut ilaata katsorsartittariaqalernerminut pissutaasoq ima oqaatigaa, ”Aqussinnaannginnakku, spil-lerlunga killeeruttarama. Allorfimmit ikiorneqarsinnaanera iluaqutigaara,” katsorsarteqataasoq, kinaassutsiminik isertuussisoq oqarpoq.

 

Odensemi aningaasanoorajunnermut katsorsaaneq danskisut ingerlanneqarpoq, peqataasorlu isumaqarpoq katsorsaasut pikkoreqimmata qallunaatut ingerlanera paasinartoq, ikioqatigiilluarsimappullu.

Kalaaliinnaanerput assut iluaqutaavoq. Ludomanimik tiguarteqqalluni toqqorternartorujussuugami, paasillugu kisimiinnani ammarnartorujussuuvoq,” katsorsartissimasoq oqarpoq.

 

Katsorsartissimasuttaaq aningaasanoorajunnermut uerisimasut allat ikiortissarsiornissaminnut sapileqqasut Allorfimmut saaffiginnillutik ikiortissarsiornissaannik innersuuppai.

”Uanga aatsaat nakkavikkama ikioqquvunga,” aningaasanoorajunnermik katsorsaanermi peqataasoq oqarpoq.

Peqataasimasullu oqaatigaa katsorsartereerluni angerlaqqikkami spillerusussuseerussimalluni. Katsorsartinngikkallarami eqqarsaatigisarsimavai: ”Oddsernissaq aamma arsaattut malinnaaffiginissaat, aningaasanillu immaqa eqquinissara. Aningaasanik eqquisarnikuuvunga, taakkuali aamma nungullugit atoqqittarpakka,” taama oqarpoq Odensemi aningaasanoorajunnermik katsorsartittut ilaat.

 

Ataqatigiinneq

Allorfik Avannaani katsorsaasut ilaat Ditte Hauberg oqaluttuarpoq, katsorsartittut arfineq-marluusut Danmarkimut pinerminni ulloq siulleq aallarnerfigalugu, ilaquttat kammalaatillu takoriaannaannginnamikkit, pinnguaatinik aningaasanoorutaasinnaasunik atuinnginnis-sartik anguniarlugu ikioqatigiinnissartik siunniussimagaat.

”Odensemiinnitsinni kisimiillutik aninnginnissartik isumaqatigiissutigipallappaat, taamaaliornermikkut aningaasanoornissamut ussernartorsiornissaq pinaveersaarpaat, tamannalu iluatsippoq. Katsorsartittut arlaannaalluunniit Odensemiinnitsinni pinnguarnissaq siunertaralugu aningaasanik atuinngilaq,” Ditte Hauberg oqarpoq.

 

Katsorsaasup ilanngullugu aamma oqaatigaa, innuttaasut katsorsarneqartut qaqugukkut aamma sulerinerminni aningaasanik atuilluni pinnguarusussuseqalertarneq misigisarneraat. Aammattaaq qanoq iliorlutik aningaasanoorusussusermik eqqarsaateqarnertik allamut saatissinnaagaat pillugu periusissaannik tuniorarneqartut.

”Aningaasanoortarnermut utersaannginnissaq siunertaralugu, ilaquttat qanigisat assersuutigalugu soorlu aningaasaqarneq pillugu oqaloqatigisarnissaat pingaaruteqartoq, ilanngullugu kaammattuutigineqarpoq,” Ditte Hauberg oqarpoq.

 

Allorfimmi Katsorsaasut

Katsorsaasut marluk ulluinnarni Allorfimmi inunnik oqaloqatiginnittartut, nunatsinniit Odensemut angalaqataapput, taakkua pikkorissaatigalutik katsorsaaneq tamaat peqataaffigaat. 

 

Innuttaasut katsorsarneqartut inuunerat aningaasanoortarnermut tunngatillugu eqqarsar-tarnerat misigissusaallu aamma katsorsaariaatsit assigiinngitsut paasisaqarfigineqarput.

 

”Paasisagut nunatsinni aningaasanoortarneq pillugu katsorsaanissami atorluarneqassapput.” Allorfimmi Ilulissaniittumi katsorsaasoq, Ditte Hauberg oqarpoq.

 

Annertunerusumik paasisaqarusunnermi Allorfimmi fuldmægtigi Sika Brandt Wille attavigisinnaavat +299 34 66 54 imaluunniit e-mailimut sikb@allorfik.gl