Aqqaluk Heilmannip allagaanut ammasumut akissut

 

 

Asasara Aqqaluk Heilmann


Allakkamik ammasumik taasannik allapputit, tassanilu KNI Pilersuisumi inuussutissat akii isummerfigissagikka kissaatigivat.

Upernavimmi KNI-p pisiniarfiani nioqqutissat akiinik oqaaseqarnissaq politikikkut akisussaaffimma avataaniimmat aallaqqaasiullugu ilisimatitsissutigissavara. KNI-p nioqqutissanik pilersuineranut akisussaaffik Inuussutissarsiornermut Naalakkersuisumut akisussaaffigitinneqarpoq, taamaammallu apeqqutitit tassunga saaffiginnissutigisariaqarpatit. 

Ataatsimulli isigalugu uanga Naalakkersuisullu – aamma nunaqarfinni isorliunerusunilu innuttaasut - inuuniarnermi atugaat ingerlaavartumik pitsanngorsarnissaat sulissutigiuaratsigu qularutigineqassanngilaq.

Tamanna Naalakkersuisut assersuutigalugu innaallagissamut imermullu akit assigiit atulerseqqinneqarneratigut iliuuseqarfigaat, tamannalu minnerunngitsumik nunaqarfinni isorliunerusunilu innuttaasunut iluaqutsiilluarpoq. Akit assigiilersinneqarnerisigut innaallagissap erngullu akiisa appartinnerisigut ukiumut aningaasat 150 mio. kr.-nit amerlanerusut nuna tamakkerlugu innuttaasunut ingerlateqqinneqarput. Tamatuma assersuutigalugu Tasiilami ilaqutariinnut inersimasunik marlunnik meeqqanillu marlunnik angissusilinni ukiumut 8.000 kr.-t angullugit sipaaruteqartoqarnera nassataraa.

Aningaasanut inatsimmi kingullermi; 2020-mut aningaasanut inatsimmi, Naalakkersuisut illoqarfinni minnerusuni, nunaqarfinni isorliunerusunilu sanaartornernut iluarsaassigasuarnissanullu sillimmatinik 15 mio. kr.-nik aningaasartalinnik nutaatut immikkoortitsipput. Sillimmatit taakku kommunit suleqatigalugit atugassanngortinneqarnissaat naatsorsuutigineqarpoq.

2020-mut aningaasanut inatsimmik isumaqatigiissummi sulinermut ilanngaammut, minnerunngitsumik isertitakitsunut akunnattumillu isertitalinnut iluaqutaasussamik, aningaasanik immikkoortitsisoqarnera nunaqarfinnut isorliunerusunullu annertunermik iluaqutsiissaaq. Taamattaaq utoqqalinermi soraarnerussutisiat annikilliartortinneqartarnerannik allannguineq akuersissutigineqarpoq, taannalu ukiuni aggersuni aningaasarsiornerup suliffeqarnerullu siuariartornissaannut pitsaasumik sinaakkusiissaaq.

Aningaasaqarnermut Naalakkersuisutut nalunngeqatiginnissuteqarluarlunga, uanga Naalakkersuisullu akissaatikinnerit inuunerisa oqinnerulernissaannut iliuuseqarluarsimagatta oqaatigissavara. Illoqarfinni mikinerusuni nunaqarfinnilu innuttaasorpassuit oqimaatsorsiortut ilisimavara, Naalakkersuisulli maanna atuuttut nunaqarfinni isorliunerusunilu inuuniarnermi atukkat pitsanngorsarniarlugit annertoorujussuarmik suliniuteqartuarput. Suliniutit taakku maanga unissanngillat, qinigaaffillu tamaat nangittumik ingerlanneqassapput.

 

Inussiarnersumik inuulluaqqusillunga

Med venlig hilsen

 

Vittus Qujaukitsoq