Kinaminngaanniit corona-virusip (2019-nCoV) tuniluunnera Naalakkersuisunit malinnaavigeqqissaarneqarpoq

Corona-virusimik tuniluuttumik (2019-nCoV) tunillatsisimasut amerliartupallakkaluartut virusilu nunarpassuarnut siaruaassimagaluartoq Kalaallit Nunaani immikkut upalungaarsimanissaq maannakkorpiaq pisariaqanngilaq. Angalasimallutik tikittut aqqutigalugit Kalaallit Nunaanni napparsimasoqalersinnaanera ilimanarpianngitsutut nalilerneqarpoq aamma virusip Kalaallit Nunaanni tuniluuteriataarsinnaanera ilimanaateqanngingajattutut isigineqarpoq. Ukiup taamaalinerani takornarissat nunaniillu eqqugaasuniit suliartortut arlaqanngitsuinnaat tikittarput.

Nunatsinni peqqinnissaq pillugu oqartussaasut qanoq pisoqarnera malinnaavigeqqissaarpaat, oqartussaasullu Kalaallit Nunaanni avataanilu oqartussaasut allat qanimut attaveqarfigivaat. Suleqatigisartakkavut susassaqaqatigisavut upalungaarsimanissamut pilersaarusiat pillugit eqqartueqatigereerpavut, assersuutigalugu nunatsinniit nunatsinnullu angalanerit pillugit, tunillatsisimasunillu nunatsinnut pisoqassagaluarpat peqqinnissaqarfimmi sulisut isumannaatsuutinnissaat qulakkeerneqarluni atortut pisariaqartut qularnaarneqareerput.

Nunani tamalaani pissutsit allanngussappata nunatsinni upalungaarsimaneq ingerlaannaq naleqqussarneqassaaq.

Corona-virusip tuniluuttup nutaap (2019-nCoV) aallaavigai virusit ilisimaneqarluartut, sakkukitsumik nuffasertitsisartut aammali anersaartuutitigut aseruutitserujussuarsinnaasut. Maannakkumut takusinnaasat malillugit virusi 2019-nCoV-i SARS-itulli 2002-2003-mi tuniluuttutut, perulutsitsisartigerpasinngilaq. SARS aamma Corona-virusimit aallaaveqarpoq.

Napparsimasut amerlanerpaartaat Kinami illoqarfimmi Wuhanimi tuniniaavissuarmi uumasunit tunillatsissimapput. Paasineqarportaaq virusi inuit akornanni tuniluuttartoq, kisianni maannakkumut misilittakkanit takuneqarsinnaavoq tunillatsissagaanni inuit qanittuararsuarmik attassuteqarsimasariaqartut.

Naalagaaffiit Peqatigiit peqqinnissaq pillugu kattuffissuat WHO naapertorlugu corona-virusip tuniluunnera nunap tamalaat akornanni peqqissutsimut aarlerinartorsiortitsisutut oqaatigissallugu siusippallaarpoq.

Paasisaqarnerujumallutit naalakkerusuisup allaattaa Inger Heilmann Larsen oqarasuaatikkut +299 55 41 60 imaluunniit e-mail: ihla@nanoq.gl attavigiuk.