Naalakkersuisut Siulittaasuat ukiortaami Aasianni innuttaasunut ilassinnippoq

Naalakkersuisut Siulittaasuat Kim Kielsen, kiisalu Ineqarnermut Attaveqaqatigiinnermut Naalakkersuisoq Karl Frederik Danielsen, sisamanngorneq januaarip 23-iani Aasiaat Katersortarfiani Qassimi aasiammiut ukiortaami ilassivaat.

Naalakkersuisut Siulittaasuata Kim Kielsenip ukiortaami ilassinnittarneq innuttaasunut ilassinninninngorlugu ukiut tamaasa 2017-imiilli ingerlattalersimavaa.

Innuttaasunik ilassinnittarnerit ukiut tamaasa Nuummi Katuami ingerlanneqartarsimasut ukioq manna sinerissami illoqarfinni assigiinngitsuni ingerlatissallugu aalajangersimavoq.

Ukioq 2020-ip aallartinneraniit innuttaasunik ilassinninneq siulleq sisamanngorneq januaarip 23-iani Aasiaat Katersortarfianni Qassimi unnukkut arfineq-marluniit qulaaluat tungaanut innuttaasunit soqutigineqarluartumik ingerlanneqarpoq, Aasianni innuttaasut 180-it missaat peqataaffigisaannik.

Aasianni nipilersortartut ilisarisimaneqarluartut Aviaq Grønvold aamma Marius Sandgreen unnussiuaarnermi appisimaarput.

Naalakkersuisut Siulittaasuat tikilluaqqusilluni oqaluagiarnermini ukiumi qaangiuttumi angusat killiffiillu kiisalu ukiumi nutaami pilersaarutit oqalugiutigai. Unnuullu ingerlanerani innuttaasut Naalakkersuisunut apuukkusutaat aallaavigalugit oqaloqatigalugit.

Innuttaasunik ilassinninnissat allat
Aasianni innuttasuunik ilassinnerup saniatigut Ilulissani, Qasigiannguani Ilimanamilu innuttaasunik ilassinninnerit ingerlanneqassapput. Arfininngorneq januaarip 25-anni Ilulissani Sermermiuni; Sapaat januaarip 26-ani Ilimanami, aammalu ataasinngorneq januaarip 27-iani Qasigiannguit katersortarfianni.