Nunatta EU-llu akornanni isumaqatigiinniarnerit aallartipput

EU-mut Aalisarnikkut suleqatigiinneq pillugu isumaqatigiissutissaq aamma isumaqatigiissummut tapiliussassaq pillugit isumaqatigiinniarnerit aallartinneqarput

Kalaallit Nunaata EU-llu aalisarneq pillugu isumaqatigiissutaa 2020-p naanerani atorunnaassaaq. Aalisarneq pillugu isumaqatigiissummut tapiliussassaq pillugu isumaqatigiinniarnernut atatillugu illuatungeriit marluullutik kissaatigaat Aalisarnikkut suleqatigiinneq pillugu isumaqatigiissut nutarterneqassasoq, taamaalilluni siunissami isumaqatigiissutissaq 2007-imiilli, isumaqatigiissutip atuuttup atuutilerfigisaaniit, allanngoriartornermut naapertuutilerniassammat.

Taamaammat Kalaallit Nunaata EU-llu Aalisarnikkut suleqatigiinneq pillugu isumaqatigiissutissaq aamma taassuma ataani isumaqatigiissummut tapiliussassaq pillugit isumaqatigiinniarnerit januaarip 15-iannit 17-iannut 2020-mi aallartippaat.

2020-mi upernaakkut pingasoriarlutik isumaqatigiinniartassasut periaasissanullu tunngatillugu ataatsimeeqattaartassasut naatsorsuutigineqarpoq. Bruxellesimi aappassaannik marsimi isumaqatigiinniartoqassaaq, naatsorsuutigineqarporlu isumaqatigiinniarnerit Nuummi aasartinnagu naammassineqassasut.

Naalakkersuisut isumaqatiginninniartussanik EU-mut isumaqatigiinniarnernik suliaqartussanik pilersitsereerput. Isumaqatiginninniartussat Aalisarnermut, Piniarnermut Nunalerinermullu Naalakkersuisoqarfimmit siuttuuffigineqassapput, ukulu  peqataateqassapput KANUAANA, Aningaasaqarnermut Naalakkersuisoqarfik, Nunanut Allanut Naalakkersuisoqarfik, KNAPK aamma Sulisitsisut, GE.

EU-p aamma Kalaallit Nunaata Aalisarneq pillugu isumaqatigiissutaa atuuttoq taaneqareersutut 2007-imeersuuvoq. Taamaaqataanik Aalisarneq pillugu isumaqatigiissummut maannakkut Tapiliussaq piffissami 1.1.2016-imiit 31.12.2020-imut atuuttuuvoq. Aalisarnikkut suleqatigiinneq pillugu isumaqatigiissut aalisarnermut tunngassuteqartuni Kalaallit Nunaata EU-llu akornanni suleqatigiinnermut tunngavissiaavoq, Isumaqatigiissummullu tapiliussap imarai suleqatigiinnermut periaasissanut piumasaqaatit soorlu akuersissuteqartarnerit, nakkutilliineq, pisassiissutit atorneqanngitsut, nunap immikkoortuinut tapiissutit allallu.

Paasissutissanik erseqqinnerusunik perusuttoqarpat Aalisarnermut, Piniarnermut Nunalerinermullu Naalakkersuisoqarfimmi immikkoortortaqarfimmi pisortaq, Emanuel Rosing, attavigineqarsinnaavoq, oqarasuaat: 34 53 04, e-mail: emro@nanoq gl.