Europami nunatsinnit inuussutissarsiorfimmit nittarsaassineq annertooq

Nunatsinnit inuussutissarsiorfimmit sinniisut, kiisalu pisortanit sinniisut pisinnaatitsissutinillu piginnittut 50-it pallillugit 2020-mi januaarip qaammataani Danmarkimi, Tysklandimi Frankrigimilu inuussutissarsiorfimmit nittarsaassinerni annertoorsuarmi peqataassapput.

Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoq Jess Svane siuttoralugu sap. akunnerata 4-p nalaani nunani taakkunani pingasuni inuussutissarsiorfimmut tunngasunik pisussat arlallit ingerlanneqassapput. Sammineqartussaapput sermersuarmit nunatsinni erngup avammut nioqqutiginera, Kalaallit Nunaat takornariat tikiffissaattut, aamma Kalaallit Nunaanni qarasaasiaqarfissuarnik pilersitsisinnaanissaq siunertaralugu minguitsumik nukissiortarneq.

Tallimanngornermi 17. januaarimi Københavnimi Kalaallit Nunaata Sinniisoqarfiani sermeq imerlu pillugit isumasioqatigiissitsinermi 2020-mi pissarsiarineqarsinnaalersussat akuersissuteqarfissatut sumiiffiit nutaat arlallit Naalakkersuisup Jess Svanep saqqummiuppai. Periarfissat pillugit tusarniaaniarlutik nunat tamalaanit sermimik/imermik suliaqartut, ambassadit, aamma maannakkut aammalu sermimik/imermik pisinnaatitsissummik piginnittuusinnaasut arlallit najuupput.

Neqerooruteqartitsinissaq nutaaq tassaavoq 2019-imi naammassineqartutut iluatsilluartutut neqerooruteqartitsinerup siulliup malitsigisaa, taamanikkut Kalaallit Nunaata kitaani sumiiffiit tallimat neqeroorutigisinneqarput, kinguneralugit ingerlatseqatigiiffinnit arfineq-marlunnit qinnuteqaatit 16-it.

Neqerooruteqartitsineq nutaaq nunatsinni inuussutissarsiorfinnut januaarip 7.-iannit 10.-annut illoqarfinni Nuummi, Maniitsumi Qaqortumilu saqqummiunneqarpoq.

Tamatuma kingornatigut Tysklandiliartoqassaaq, qarasaasiaqarfinnik suliffissuaqarfimmi tikeraarnermut Frankfurt qitiussalluni. Tamaani toqqammavissatut atugassarisat aamma Kalaallit Nunaanni qarasaasiaqarfissuarmut piukkunnaataasut oqaluuserineqassapput, aallaavigineqarlutik sermersuarmit imeqarfittut piukkunnaataasut annertuupilussuit. Tikeraarneruttaaq Frankfurtimi itsarsuarnisalerinermik katersugaasivimmi Nuka Godtfredsenip saqqummersitaanik Qanga’mik tikeraagaqarnissaq periarfississaavaa.

Kingornatigut Berlinimi Kalaallit Nunaata Ullua ingerlanneqassaaq, tamaanilu nunatsinni inuussutissarsiorfimmi takornariartitsinermilu piukkunnaatit tamakku pillugit oqaloqateqarnissamut Tysklandimit takornariartitsinermik aamma sermimik/imermik suliaqartut arlallit qaaqquneqarsimapput. Nunatsinnit inuussutissarsiorfimmit aallartitanit aamma Tysklandimit suliaqartut qaaqqusat akornanni suliffeqarfimmit suliffeqarfimmut oqaloqatigiinnissanut arlalinnut tikeraarnissaq periarfissiivoq.

Berlinimissaaq tikeraarneq Potsdamimi Alfred Wegener Instituttimi ilisimatusarnermut attuumassuteqartumik tikeraartoqarfiussaaq, tamatuma kingornatigut aallartitat Parisimut ingerlaqqissallutik.

Tamaani Champs-Èlysèesimi Danmarkip Illuani Kalaallit Nunaata Ullua ingerlanneqassaaq, tamaanilu pisussat tassaassapput takornariartitsinermik aamma nunatsinnit imermik avammut nioqquteqarnerit oqaluuserinissaat.

Angalaneq Parisimi Airbusinik suliffissuaqarfinni tikeraarnermik naggaserneqassaaq.

”Angalanissamut nunatsinnit inuussutissarsiorfimmit soqutiginnittoqarnera tuppallissutigaara,” Naalakkersuisoq Jess Svane oqarpoq, nangillunilu: ”Kalaallit Nunaanni takornariartitsinermut piukkunnaataasup suli piviusunngortinneqanngitsup annertusarnissaanut, aammalu nunat tamalaani niuernikkut attaveqarfeqarniarnermut assut pisariaqartitsinerput tamatuma takutippaa.”

Angalanerup Tysklandimi aamma Frankrigimi takornariartitsinermik iliuuseqarnerup nukittorsaqataaffigissagaa Naalakkersuisup Jess Svanep neriuutigaa, taakkuuppummi nunatsinni isikkivigisamit Europami takornariaqarnikkut niuffaffiusumi annerpaartaasut.

Aammattaaq nunatsinnit imermik avammut nioqquteqarnissamut piukkunnaataasumik ussassaarinerup nunat tamalaani imermik soqutigisaqaqatigiinnit suli annertunerusumik soqutiginninnermik pilersitsissanera neriuutaavoq.

Annertunerusumik paasissutissarsioruit attavigiuk: Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfik, oq.: +299 345000, e-mail: isiin@nanoq.gl