Nunani Avannarlerni meeraaneq meeqqat nuannernerpaanngortissavaat

Kalaallit Nunaata meerartai meeqqat allat Nunani Avannarlerneersut peqatigalugit Nunani Avannarlerni meeraaneq nuannernerpaajussasoq pillugu isumaqatigiissummik allagaqarsimapput. 16. januar 2020-mi ministerinut, børneombudsmændinut Nunallu Avannarliit Meerartaannik Oqalliffimmi atorfilittaannut isumaqatigiissut saqqummiunneqassaaq. Peqqissutsimut, Isumaginninnermut Inatsisinillu Atuutsitsinermut Naalakkersuisoq, Martha Abelsen oqalliffimmi peqataavoq meeqqallu innersuussutaannut tusarnaaqqissaarluni.

Meeqqat 65-it Danmarkimeersut, Finlandimeersut, Kalaallit Nunaanneersut, Islandimeersut, Sverigemeersut, Savalimmiuneersut aamma Ålandimeersut isumaqatigiissummit innersuussutit allassimavaat, taakkulu inersimasunut nunani avannarlerneersunut FN-Byenimilu Nunat Avannarliit Meerartaannik Oqalliffeqartitsiffiup sumiiffiit eqqaaneersunut aallartitanut saqqummiunneqassapput. Kalaallit Nunaanni NAKUUSAp Meeqqat Isummersorfiannit Meeqqat tallimat kommunineersut innersuussutinik saqqummiussinermi peqataassapput. Martha Abelsenip saniatigut innersuussutinik tigusisussat ilaatigut tassaapput Meeqqat illersuisuat, Aviâja Egede Lynge, kiisalu atorfilittat Kalaallit Nunaanneersut.

“Meeqqat susassaqarfinni sunnertittartut tusaassagivut qitiulluinnarpoq. Taamaattumik meeqqat ilanngutitinneqarnissaannut qulakkeerinninnissamik isumaqatigiissummit innersuussutit sakkussaapput pingaarutillit. Meeqqat nunanit avannarlernit tamaneersut sumiiffinneersullu sulinermut peqataasimmata innersuussutit patajaalluinnarput. Taamaattumik Nunat Avannarliit Meerartaannik Oqalliffeqartitsiffimmi meeqqanut inersimasunullu Kalaallit Nunaat siamasissumik ilisaritinneqarmat nuannaarutigaara” Peqqissutsimut, Isumaginninnermut Inatsisinillu Atuutsitsinermut Naalakkersuisoq, Martha Abelsen taama oqarpoq.

Ukiaq 2019-imili meeqqat isumaqatigiissummik suliaqarnerat aallartissimavoq, taannalu Naalagaaffiit Peqatigiit Meeqqat pillugit isumaqatigiissutaannik aallaaveqarpoq.

20. november 2019-imi Naalagaaffiit Peqatigiit Meeqqat pillugit isumaqatigiissutaat ukiut 30-nngortorsiorneranut atatillugu Nunat Avannarliit ministeriisa Siunnersuisoqatigiinnit, Meeqqat pillugit Siunnersuisoqatigiinnit, Social- og Indenrigsministeriamit aamma UNICEF Danmarkimit Nunat Avannarliit Meerartaannik Oqalliffeqartitsiffik aaqqissuunneqarpoq.

Paasissutissat sukumiinerusut pillugit attavissaq ministersekretær Inger Heilmann Larsen e-mail:ikkut ihla@nanoq.gl imaluunniit oqa. + 299 554160