Savalimmiut aamma Kalaallit Nunaat peqqinnissakkut unammilligassanik assigiinnik peqarput

Peqqissutsimut Naalakkersuisoq Martha Abelsen aamma Savalimmiuni Peqqinnissakkut ministeri Kaj Leo Holm Johannesen peqqinnissaqarfiup iluani misilittakkat suleqatigiinnissamullu periarfissaasinnaasut eqqartorlugit ataatsimeeqqammerput.

 

Martha Abelsen Savalimmiuni meeqqanut inuusuttuaqqanullu tarnikkut katsorsartinnermut neqeroorutit aamma suliassaqarfiit akimorlugit suleqatigiinnissamut piumasaqaatit pillugit tusarusussimavai. Taamaasilluni Martha Abelsen Centeret for Børn og Unge Psykiatri, savalimmiuni peqqinnissaqarfiup ataani inissisimasoq pulaarpaa.

 

”Savalimmiormiut meeqqanut inuusuttunullu tarnikkut katsorsaaneq ineriartortilluarsimavaat, tamannalu malunnaatilimmik iluaqutaasimavoq. Sullissivimmi sulisut erseqqissarpaat sullissiviup aallartisarnerani kisianni aamma meeqqat inuusuttullu ikiortariaqarneranni susassaqarfiit akimorlugit suleqatigiinnerup pingaaruteqassusianik. Tarnip pissusaanik immikkoortortaqarfik suliassaq kisimiilluni kivissinnaanngilaa. Pisariaqarluinnarpoq kommunini malitseqartitsinissaq,”, Martha Abelsen oqarpoq.

 

Tarnikkut immikkoortortaqarfiup saniatigut naalakkersuisuusut  nunaminni peqqinnissakkut unamminartut allat eqqartorpaat, unamminartunillu assigiissuteqarput, soorlu assersuutigalugu sukkornermi, sulisussarsiornermi kiisalu Københavnimi napparsimasut angerlarsimaffianni inissaqarniarnikkut killeqarneq. 

 

Naalakkersuisuusut nunat avannarliit killerni augustimi peqqinnissakkut naalakkersuisut misilittakkatik avitseqatiginiarlugit aamma Peqqinnissakkut unammilligassat  aamma inoqarfinni mikisuni pitsaaliuineq qulequtaralugu suleqatigiinnissamut oqaloqatigiissutigissavaat.

 

”Savalimmiuni tikeraarneq assut pissarsiaqarluarnarpoq pingaartumik takullugu tusaallugulu meeqqat inuusuttullu tarnikkut katsorsaanerup ineriartorsimanerat. Suliassaqarfik tamanna naammaginartumik nunatsinni ineriartortissagutsigu pingaaruteqarpoq nunami tamarmi kommunimilu suliassamut politikkikkut pingaarnersiuinissaq, taamaasilluni suliamut tunngasutigut piginnaanngorsartoqarsinnaaniassammat meeqqallu inuusuttuaqqallu tarnimikkut napparsimasut unamminiagaqartullu ataavartumik katsorsartinneqarsinnaaniassammata” Martha Abelsen naggasiivoq.

 

Nunani avannarlerni killerni peqqissutsimut naalakkersuisut, nunat akornanni Savalimmiuni, Islandimi aamma Kalaallit Nunaanni paarlakaallutik, ukiut tamaasa ataatsimiittarput. Kalaallit Nunaat ataatsimiinnermi tullermi Ilulissani august 2020-mi qaaqqusisuuvoq.

 

Paasisaqarnerujumallutit attavigiuk naalakkersuisup allattaa Inger Heilmann Larsen oqarasuaatikkut.: +299 55 41 60 imaluunniit e-mailikkut: ihla@nanoq