Danmarkimik suleqateqarneq pisariaqarpoq

Peqqissutsimut Naalakkersuisoq Martha Abelsen, Peqqissutsimut Ministeri Magnus Heunicke aamma Danske Regioners-imi siulittaasup tullia Ulla Astmann, ataatsimeeqatigeqqammerpai. Taassuma saniatigut København Kommuniani Center for Kræft og Sundhed pulaarpaa.

Naalakkersuisup ministeriullu ataatsimiinneranni siunertarineqarpoq peqqinnissaqarfiup iluani suleqatigiinnerit pioreersut assigiinngitsut ilisimatitsissutigineqarneri malinnaavigineqarnerilu. Naalakkersuisoq ministerilu isumaqatigiipput naalakkersuisoqarfikkut, napparsimaveqarfikkut aamma aqutsisoqarnikkut suleqatigiinneq annertooq aaqqissuunneqassasoq. Naalakkersuisut taakku marluk taamaalillutik upernaamut Kalaallit Nunaanukarnerminni suleqatigiinnermut isumaqatigiissusiussapput, suleqatigiinnerlu maanna ingerlasoq siunissamilu suleqatigiinneq ingerlasussaq allaatigineqassaaq.

”Danskit politikkikkut suleriaasiannit peqqinnissaq pillugu qaninnerusumik suleqatiginnikkumanermik annertuumik naapitsivunga. Aamma isumaqarpunga tamanna pisariaqarluinnartoq nakorsartinnermummi neqeroorutit immikkut nakorsanit annerusumik aammalu innuttaasunit napparsimasunillu piumasaqaatit annertusiartormata”, Martha Abelsen naggasiivoq.

Danske Regioner ataatsimeeqatigineranut siunertaavoq Kalaallit Nunaanni Peqqinnissaqarfimmut peqqinnissakkut sulisunik atorfinitsitsiniarneq pillugu annerusumik nukittunerusumillu suleqatigiinnerunissaq. Peqqinnissakkut sulisorisat danskit napparsimaveqarfianeersut ajornannginnerusumik paarlaasseqatigiittalernissaat siunertaavoq, taamaasilluni immikkuullarissumik suliakkut kulturikkullu Kalaallit Nunaanni misigisaqarsinnaaniassammata.

”Nuannaarutigeqaara Danske Regioner peqqinnissaqarfitsinnut atorfinitsitsiniarnerni pitsanngorsaaqataaniarnermi akisussaaqataanerminnik oqariartuuteqarmata, aamma kissaaterput ingerlateqqikkusummassuk. Tamanna napparsimaveqarfitsinnut peqqinnissakkut sulisut atorfinitsinneqarnissaanut ajornannginnerulernissaanut neriuutissimmannga.” Martha Abelsen oqaaseqarpoq

Center for Kræft og Sundhed, napparsimasunut kræfteqartunut piginnaanngorsaqqiinermut kommunimiit neqeroorutaavoq, kalaallit peqqissartut illuani kalaallit napparsimasut centerimi neqeroorutit atornissaannut isumaqatigiissusiortoqarnissaanik isumaqatigiittoqarpoq.
Paasisaqarnerujumallutit attavigiuk naalakkersuisup allattaa Inger Heilmann Larsen oqarasuaatikkut.: +299 55 41 60 imaluunniit e-mailikkut: ihla@nanoq.gl