Soraarnerussutisiaqalernissamut aaqqissuussinermut peqataasussaatitaaneq

 

Ulloq 1. januar 2018 soraarnerussutisiaqalernissamut aaqqissuussinermut peqataasussaatitaaneq pillugu Inatsisartut inatsisaat atuutilerpoq. Inatsit imminut pilersornerup annertunerulernissaanik Naalakkersuisut periusissiaanut pingaarutilimmik ilaavoq. Inatsit naapertorlugu innuttaasoq nammineq soraarninngornissamut sipaaruteqarnissamut pisussaaffilerneqarpoq, taamaalilluni innuttaasut tamarmik annertunerusumik utoqqalinissaminni imminnut pilersorsinnaanngussallutik.

Innuttaasut 80 %-init amerlanerusut soraarnerussutisianik aaqqissuussinermut pinngitsoornani ilaanissaq pillugu Inatsisartut inatsisaat nr. 21, ulloq 28. november 2016-imeersoq naapertorlugu soraarnerussutisiassanik sipaarnissamut pisussaaffitsik naammassivaat. Taakku ilimagineqaqqaartunit amerlanerupput.

Aaqqissuussinerulli atuunnerani ukiumi siullermi Akileraartarnermut Aqutsisoqarfiup naatsorsugaani kukkunernik arlalinnik aamma nassaartoqarpoq. Innuttaasut arlallit 2020-mut skattekortiminni akileraarutissatut procentimik kukkusumik qaffaavigineqarsimanerannik tamanna nassataqarpoq. Akileraartarnermut Aqutsisoqarfiup kukkuneq utoqqatsissutigaa, maannalu kukkuneq aaqqiiviginiarlugu ulapputtoqarpoq.

Innuttaasulli 2020-mut skattekortiminni qaffatamik procentimik akileraarusiisumik pissarsisut amerlanerpaat skattekortimik eqqortumik pissarsipput, innuttaasummi taakku soraarnerussutisiaqalernissamut aaqqissuussinermut akilersuinissamut naammassinninngillat.

Akileraartarnermulli Aqutsisoqarfiup unamminartut makku siumorpai:

Sulisitsisunit aqunneqartunik aaqqissuussinerit: Akileraartarnermut Aqutsisoqarfik sulisitsisut nalunaarsuutaat toqqammavigalugit naatsorsuusiortarpoq. Pisuni arlalinni sulisitsisut innuttaasut soraarnerussutisiatut katersaannut eqqortumik akiliisoqartarpoq, taamaattoq Akileraartarnermut Aqutsisoqarfimmut eqqunngitsumik nalunaarutiginnittoqartarluniluunniit nalunaarutiginnittoqarneq ajorpoq. Siunissami Akileraartarnermut Aqutsisoqarfiup ilaatigut sulisitsisunik annertusisamik ilitsersuinermik suliaqassaaq, kiisalu sulisitsisut nalunaarsuutaat soraarnerussutisianik katersiviit nalunaarutaannut sanillersuullugit nakkutigisassallugit.

Naalagaaffiup Kalaallit Nunaanni tjenestemanditut atorfeqartitai: Akileraartarnermut Aqutsisoqarfiup naatsorsukkani sulisitsisut tjenestemandit akiliutaat pillugit paasissutissiissutaannik toqqammaveqartittarpaa. Aningasaat kukkuluttornikkut tjenestemandit akiliutaattut nalunaarsorneqartanngitsut, arlalitsigut paasineqarpoq. Taamaammat tjenestemandit taakku eqqunngitsumik pinngitsoornani soraarnerussutisiassanik katersisussaasutut inissisimapput. Akileraartarnermut Aqutsisoqarfiup qitiusumi paasissutissanik toqqammaviit eqqortunngortinneqarnissaat sulissutigaa, taamaalilluni naalagaaffiup tjenestemanditut atorfeqartitaasa tjenestemanditut akiliuteqarnertik pissutigalugu peqataasussaajunnaarsinneqassallutik.

Innuttaasut piffissaq eqqorlugu uppernarsaatinik eqqortunik nassitsisut: Innuttaasut uppernarsaatinik naammattunik nassitsinikut qarasaasiani kukkuluttornikkut procentimik akileraarutissaminnik qaffaavigineqarput. Akileraartarnermut Aqutsisoqarfiup atortorissaarutini kukkuneq skattekortillu kukkunillit aaqqinniarlugit innuttaasullu sapinngisamik piaarnerpaamik nutaamik nassinneqarnissaat siunertarlugit sulivoq.

Uppernarsaasiinissamik nalornissuteqarneq
Peqatigisaanillu innuttaasut amerlasuut soraarnerussutisianut katersivinnut akiliutimik qanoq uppernarsaasernissaa nalornissutigigaat Akileraartarnermut Aqutsisoqarfiup paasivaa. Akileraartarnermut Aqutsisoqarfik uppernarsaasiisarneq pillugu saaffiginnissutini arlalinnik tigusaqarpoq, uppernarsaatinillu naammanngitsut pillugit saaffigineqarluni.

Akileraartarnermut Aqutsisoqarfiup aningaaserivinnit Kalaallit Nunaanni angerlarsimaffilinnit kiisalu Kalallit Nunaanni Qallunaallu Nunaanni soraarnerussutisianit aqutsisut uppernarsaasiussat akuerisarai. Assersuutigalugu netbankimit uppernarsaatit aniatitat innuttaasup aqqa atorlugu soraarnerussutisianik aaqqissuussanut nuussinerit pisimasut erseqqissumik takussutissaqarpat, taakku akuerineqarsinnaapput.

Uppernarsaatitut assersuutit tulliuttut akuerineqarsinnaanngillat:
  • Akissarsiat allagartaasa assilineri. Akileraartarnermut Aqutsisoqarfiup naatsorsuinini sulisitsisut Akileraartarnermut Aqutsisoqarfimmut nalunaarutaat toqqammavigalugit ingerlattarpaa. Sulisitsisup Akileraartarnermut Aqutsisoqarfimmut nalunaarutai sulisitsisullu sulisartumut nalunaarutai (akissarsiat allagartaat) assigiinngissappata, sulisitsisup Akileraartarnermut Aqutsisoqarfimmut nalunaarutai tunngavissaatinneqartarput. Innuttaasut akissarsiamik allagartaani paasissutissiissutinik isumaqataanngitsut sulisitsisuminnut saaffiginninnissamik qinnuigineqarput.
  • Netbankimit assilissap anillatinnera innuttaasup aqqa atorlugu soraarnerussutisianik katersivimmut nuussinermik paasissutissanik amigaatilik. Assersuutigalugu kontomut atermik allassimasoqanngitsumut nuussineq akuerineqarsinnaanngilaq.
  • Kalaallit Nunaanni aningaaseriviunngitsuni, kiisalu kalaallit qallunaallu soraarnerussutisianit aqunneqanngitsuni soraarnerussutisianik aaqqissuussinerit akuerineqanngillat.
Procentip akileraarutaasup annertusinera
Innuttaasut soraarnerussutisiassanut sipaarnissamut pisussaaffimmik eqqortitsinngitsut ukiumi isertitaqarfiusumi kingusinnerusumi procentimik akileraarutissaminnik qaffaavigineqassapput. Soraarnerussutisiassamik sipaarnissamut pisussaaffimmik naatsorsuineq, innuttaasut ataasiakkaat ukiumut isertitaanik naatsorsuinermik toqqammaveqartinneqartarpoq. Taamaammat naatsorsuineq kipungasarpoq, assersuut takuuk:

Ukiumut isertitaqarfiusumut 2018-imut ukiumoortumik naatsorsugaq august 2019-imi nassiunneqartarpoq. Soraarnerussutisiaqalernissamut aaqqissuussinermut peqataasussaatitaanermut attuumassuteqartut, ukiumut isertitanik naatsorsukkanik nassiussinermi ilanngunneqartarpoq. 2018-imut soraarnerussutisianut pisussaaffimmik naammassinninnginnermi ukiumi akileraarfiusumi tullermi procenti akileraarutaasoq qaffanneqassaaq, assersuummilu uani taanna 2020-miussaaq.

Innuttaasut ataasiakkaat soraarnerussutisiassanik katersinissamut pisussaaffimminik naammassinninnissaat qulakkeerniarlugu, Akileraartarnermut Aqutsisoqarfiup procenti akileraarutaasoq 2020-mi 6 %-inik qaffassinnaavaa. Aningaasat qaffaassutit innuttaasup aqqa atorlugu soraarnerussutisianik aaqqissuussamut nuunneqassaaq.

Procentimut akileraarutaasumut qaffaassutit Akileraartarnermut Aqutsisoqarfiup nittartakkakkut quppernerani uani takuneqarsinnaapput.

Immikkut akuerineqarnissamut periarfissaq
Ukiumut nalunaarsuiffimmi soraarnerussutisiatut katersinissamut pisussaaffimmik naammassinnittoqannginnera paasinarsippat, innuttaasoq naammassinninnerminut uppernarsaatinik nassitsinissamut sapaatip akunnerinik sisamanik periarfissinneqartarpoq. Akileraartarnermut Aqutsisoqarfik piffissami immikkut akuersissuteqarfiusup iluani naammattunik uppernarsaatinik tigusaqarpat, procenti akileraarutaasoq qaffanneqassanngilaq.

Aaqqissuussinerup atuunnerani ukiuni siullerni Akileraartarnermut Aqutsisoqarfik uppernarsaatinik nassitsinissamut immikkut ittumik 4. december 2019 angullugu periarfissiivoq. Piffissap immikkut akuersissuteqarfiusumi annertusisami qarasaasiami kukkunerit pissutigalugit inuutaasut paasissutissanik kukkusunik tigusaqarsimasut periarfissinnissaannik Akileraartarnermut Aqutsisoqarfiup qulakkeerinnikkumaneranik patsiseqarpoq.

Akileraratarnermut Aqutsisoqarfiup soraarnerussutisianut katersivinnut akiliutitut uppernarsaatit akuerereeraluarlugit, ajoraluartumik skattekortinik procentinik akileraarutissanik qaffaaffiusunik kukkunikkut nassitsisoqarsimasoq Akileraartarnermut Aqutsisoqarfiup paasivaa.

Kisitsisit pingaarnerit
2018-imut ukiumut nalunaarsuutinik nassitsinermi, innuttaasut amerlanerpaartaasa soraarnerussutisianut katersinissamut pisussaaffitsik naammassisimagaat Naalakkersuisut nuannaarutigalugu paasivaat.

 

Amerlassutsit

Procentit

Naammassinnittut*

34.094

82,8 %

Immikkut akuersissuteqarluni suliarineqartut**

566

1,4 %

Naammassinninngitsut 

6.628

16,1 %

Innuttaasut sipaaruteqarnissamik pisussaaffillit katillugit amerlassusaat

41.288

100 %

*) 1.000 kr-t qummut tikillugit sipaagaqanngitsoortut naammassinnittutut isigineqartarput.

**) Immikkut akuersissuteqarfiit pillugit saaffiginnittut arlallit ilaannakortumik naammassinninnermik takutitsipput. Ass.: Pisussaaffik 5.000 kr-it, taamaallaalli 4.000 kr-nik uppernarsaatinik nassitsisoqarpoq.

Innuttaasut soraarnerussutisiassanut katersinissamut pisussaaffimmik naammassinninngitsut

Innuttaasut 2018-imut - 2018-ip ingerlanerani piffissamiluunniit immikkut akuersissuteqarfiusup ingerlanerani - soraarnerussutisiassanik katersinissamut pisussaaffimminnik naammassinninngitsut. Innuttaasut taakku 2020-mi procentimik akileraarutissaminnik qaffaavigineqassapput. 2018-imut tunngatillugu soraarnerussutisiamik katersinermik aaqqissuussamut akiliinissamut pisussaaffimmut immikkut akuerseqqittoqarsinnaanngilaq. Tassa: piffissap immikkut akuersissuteqarfiusup qaangiunnerani immikkut ittumik akiliisinnaanermut periarfissiisoqarsinnaanngilaq.

Kingusinaarlunili soraarnerussutisianut aaqqissuussinermut akiliutit annaaneqarsinnaanngillat. 4. decemberimit 31. december 2019-ip tungaanut immikkut ittumik akiliutit 2019-imi pisussaaffinnut ilanngullugit naatsorsorneqassapput. 2020-mi soraarnerussutisianut katersinermut aaqqissuussamut nalinginnaasumik akiliutit taamaalilluni 2020-mi pisussaaffimmut ilanngullugu naatsorsuunneqassaaq.

Soraarnerussutisiaqalernissamut aaqqissuussinermut peqataasussaatitaaneq pillugu paasissutissat erseqqinnerusut Akileraartarnermut Aqutsisoqarfiup nittartakkakkut quppernerani uani takuuk

Attaveqaat: Rannvá Clementsen, Akileraartarnermut Aqutsisoqarfik, ranv@nanoq.gl, Toqq. +299 34 65 79