Sukisaarsaatigalugu aalisartitsilluni takornarialerinermut akuersissutit

Naalakkersuisut, Kommuneqarfik Sermersooq suleqatigalugu, matumuuna Kommuneqarfik Sermersuumi Qussummi / Narsarsuarmi sukisaarsaatigalugu aalisarnissaq pillugu takornarialerinermik ingerlatsinissamut akuersissummik qinnuteqaqqusipput.

Innuttaasut suliffeqarfiillu soqutiginnittut Qussummi / Narsarsuarmi nunap ilaani ataatsimi sukisaarsaatigalugu aalisarnermik kisermaassilluni neqerooruteqarsinnaanermut akuersissummik piumallutik qinuteqaqquneqarput.

Kommuneqarfik Sermersuup kommunimut pilersaarummut tapiliussaq nr. O9 tunngavigalugu Qussummi / Narsarsuarmi sukisaarsaatigalugu aalisarnermut akuersissuteqarfiusussaq (kommunimut pilersaarummut tapiliussaq) nunap ilaa ataaseq sukisaarsaatigalugu aalisarnermut akuersissuteqarfiusussatut immikkoortissimavaa. Kommunimut pilersaarummut tapiliussaq tassaavoq Kommuneqarfik Sermersuumut Kommunimut Pilersaarut 2028-mut tapiliussaq. Qinnuteqaqqusissummi matumani qinnuteqaatit Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfimmit kingusinnerpaamik pingasunngornermi ulloq 4. marts 2020 nalunaaqutaq 23.59 Kalaallit Nunaanni Nuummi nalunaaqutaq malillugu tigoreerneqarsimassapput.

Sumiiffiit akuersissuteqarfiusussatut immikkoortinneqarnerat takornariaqarnermi Naalakkersuisut periaaseqarnerannut immikkoortutut ilanngutivissimasutut isigineqassaaq, tassani siunertarineqarluni nunatsinni takornariaqarnermik inuussutissarsiorfimmi namminersortut aningaasaliisarnerisa annertusarneqarnissaat taamalu ungasinnerusoq eqqarsaatigalugu siuariartorneq suliffissaqarnerlu annertunerulersillugu.

Qinnuteqaqqusissut aamma qinnuteqartitsinermi qinnuteqaqqusinermi allakkiani takornariartitsinermut akuersissummut piumasaqaasut pillugit sukumiinerusut takukkit: https://www.businessingreenland.gl/kl-GL/Udbud/Aktuelle-udbud/Koncession-til-sportsfiskeri-i-Qussuk

Qinnuteqaqqusissummut tassungalu ilanngussanut apeqqutit Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfimmut tunniunneqassapput pingasunngorneq ulloq 5. februar 2020 sioqqullugu una emaili atorlugu: isiin@nanoq.gl.

Apeqqutit akissutaalu attuumassuteqartut tamarmik ilisarnarunnaarsillugit Naalakkersuisut nittartagaatigut kikkunnut tamanut saqqummiunneqassapput.