Inuutissarsiutigalugu piniartunut puisit amiinik tunisisimasunut bonusinik akiliuteqarneq

Stemningsbillede

Ukiut siulii assigalugit 2019-imi Great Greenland A/S-imut puisit amiinik tunisisimasunut inuutissarsiutigalugu piniartunut bonusinik akiliuteqarnissaq Naalakkersuisut aalajangiussimavaat.

 

Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoq Jess Svane oqarpoq:

 

”Puisit amiinik tunisisimasunut inuutissarsiutigalugu piniartunut ukiormanna aamma bonusinik akiliuteqartoqassasoq nuannaarutigalugu nalunaarutigisinnaavara. Puisinniarneq kulturitsinni kingornussatta pingaarutilittut ilagaa, aammalu sinerissami isertitaqarsinnaaffinnik pilersitsinissami Naalakkersuisut naalakkersueriaasaannut pingaarutilittut ilaavoq.”

 

2019-imut bonusit tamakkiisut koruunit 1 mio.-upput, puisillu amiinut tunisinissamut tapiissutinut aningaasaliissutaasut tamarmiusut iluanni akiliutigineqassapput.

 

Akiliinerit piniartut ataasiakkaat tunisaasa annertussusaat malillugit Great Greenland A/S-imit isumagineqassapput.

 

 

Annertunermik paasissutisat pillugit attaveqarfigiuk:

Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfik. Email: isiin@nanoq.gl, telefon +299 34 50 00.