Umimmanniarneq aamma Tuttunniarneq - Ukiuunera 2020

Matumuuna ukiuunerani 2020-imi tuttunniarnissamut umimmanniarnissamullu piffissaliussat, tuttutassiissutit kiisalu umimmattassiissutit aalajangerneqartut nalunaarutigineqarput. Ukiuni makkunani Pinngortitaleriffimmiit piniarfinni ukunani tuttunik aamma umimmannik pisortatigoortumik kisitsisoqarnikuuvoq; Piniarfik 2-mi (Sisimiut-Kangerlussuaq), Piniarfik 3-mi (Akia-Maniitsoq) aamma Piniarfik 4-mi (Ameralik). Kisitsinermiit nalunaarusiat maannakkut suliarineqarput soorluttaaq pisortatigoortumik siunnersuineq suliarineqartoq.

Tuttut
1. Aqutsiveqarfik Qaanaaq: Nuna Inglefield-mi aamma Prudhoe-mi ukiuunerani 2020-mi inuussutissarsiutigalugu aamma sunngiffimmi tuttunniarneq 1. januaarimiit 30. april ilanngullugu ingerlassaaq tassanilu ukiaanerani 2019-miit tuttutassiissutit sinneruttut pineqarlutik. Kangerluarsorujak-mi tuttut kumallit ukiuunerani killeqanngitsumik piniarneqassapput.

Tunngavilersuutit: Ukiaanerani 2019-mi Piniarfimmi 2-mi, Piniarfik 3-mi, Piniarfik 4-mi aamma Piniarfik 5-mi qaammatini tallimani killeqanngitsumik inuussutissarsiutigalugu tuttunniartoqarpoq. Piniarfinni pineqartuni tuttut amerlavallaalersimanerat tassani tunngaviuvoq. Piniarnermut Naalakkersuisoq aalajangerpoq ukiuunerani killilimmik inuussutissarsiutigalugu tuttunniarneq ukiuni kingullerni ingerlanneqartartoq Biologit inassuteqaataat malillugu unitsinneqassasoq. APNN-ip kommunit qanimut suleqatigalugit akuersissutinik utertitsisarneq malinnaaffigivaa, utertinneqartannginnerat taamatullu pisanik nalunaaruteqartannginneq piniartunut ataasiakkaanut akuersissutinik qinnuteqarsinnaanissamut ukiuni aggersuni kinguneqassaaq. Erseqqissaatigineqassaaq qamuteralaat, ATV-t kiisalu qamutit motoorinik ingerlatillit allat tuttunik malersuinermi piniutigissallugilluunniit inerteqqutaasut assartuutillu motoorillit tuttunut minnerpaamik 500 meterinik ungasissuseqassasut.

Umimmaat
2. Aqutsiveqarfik Maniitsoq: Piniarfik 1-imi, Piniarfik 3-mi aamma Piniarfik 4-mi ukiuunerani killilimmik umimmanniarneq 25. januaarimi 2020-mi aallartissaaq 14. februaari ilanngullugu ingerlassalluni kulavaat norrallit aamma tammajuitsussat tiggaat piniaqqusaanatik. Piniarfik 1-mi 100-nik umimmattassiisoqarpoq, Piniarfik 3 –mi aamma 4-mi ataatsimut katillugit 1.200-nik umimmattassiisoqarluni. Piniarfik 1-mi qimussimik pisummillu umimmanniartoqassaaq assartuutit motoorillit taamaalillutik atoqqusaanngillat. Piniarfik 3-mi aamma Piniarfik 4-mi motoorilinnik pisanik assartuisoqarsinnaavoq.
Piniarfik 2-mi umimmannik minnerpaaffiliinikkut kisitsoqaqqinnissaa pillugu ukiuunerani 2020-mi umimmanniartoqassanngilaq.
3. Aqutsiveqarfik Sisimiut: Ukiuunerani umimmanniarneq matoqqavoq.
4. Umimmaqarfik Naternaq: Ukiuunerani umimmanniarneq matoqqavoq.
5. Umimmaqarfik Ivittuut: Ukiuunerani umimmanniarneq matoqqavoq.
6. Umimmaqarfik Sigguk: Ukiuunerani umimmanniarneq matoqqavoq.
7. Aqutsiveqarfik Ittoqqortoormiit: Ukiuunerani 2020-mi inuussutissarsiutigalugu aamma sunngiffimmi umimmanniarneq martsi naallugu ingerlassaaq aqutsiveqarfimmilu umimmattassiissutit 60-iullutik.
8. Aqutsiveqarfik Qaanaaq: Nuna Inglefield-mi, Nuna Prudhoe-mi aamma Qooqqunni ukiuunerani 2020-mi inuussutissarsiutigalugu aamma sunngiffimmi umimmanniarneq 1. januaarimiit 15. april ilanngullugu ingerlassaaq tassanilu ukiaanerani 2019-miit umimmattassiissutit sinneruttut pineqarlutik.

Tunngavilersuutit: Aqutsiveqarfik Ivittuuni: Ukiuni kingullerni umimmannik minnerpaaffiliinikkut kisitsisoqartarnera tunngavigalugu ukiuunerani 2020-mi umimmanniartoqassanngilaq. Ivittuuni umimmaat maannakkut amerlavallaarunnaarnerat tunngavigineqarpoq.
Aqutsiveqarfik Sisimiut-ni: Martsimi 2018-mi kisitsinermi paasineqarpoq umimmaat amerlavallaanngitsut – 2.600-iinnarnut missiliukannerneqarput - taamaammallu tassani ukiuunerani umimmanniartoqassanngilaq.
Aqutsiveqarfik Maniitsoq-mi: Aqutsiveqarfimmi ukiuunerani 2020-mi killilimmik umimmattassiisoqarnissaa Biologimit inassuteqaammik tunngaveqarpoq.
Pinngortitaleriffimmiit martsimi 2018-mi kisitsinermiit aamma nakkutilliisup ukiuni kingullerni umimmannik misissuisarneratigut paasineqarpoq Piniarfik 3-mi aamma Piniarfik 4-mi nunaminertani atsissuni tikinneqarsinnaasunilu umimmaat akuttuvallaalersut. Ukiuunerani umimmanniarnerup nalaani assartuutit motoorillit umimmannut akornutaavallaalersimapput umimmaallu amerlanerit nunaminertanut qutsissunut qullarsimapput tikinneqarsinnaanngitsunullu ungavarsimallutik norraallu tassani amerlanngitsut. Assartuutit motoorillit umimmannut akornutaanerat millisarniarlugu ukiuunerani 2020-mi umimmanniarneq siornamut assingusumik 25. januaarimiit 14. februaari ilanngullugu ingerlanneqarnissaa – tassa sapaatip akunnerini pingasuni - Biologip inassuteqaataa malillugu aalajangerneqarpoq.

APNN-miit erseqqissaatigineqarpoq assartuutit motoorillit umimmannik malersuinermi piniarnermilu atornissaat inerteqqutaasoq umimmannullu minnerpaamik 500 meter-nik ungasissueqarnissaat pillugu inatsimmi aalajangersagaq malinneqassasoq.

Sunngiffimmi tuttunniarnissamut umimmanniarnissamullu akuersissutit inunnut Kalaallit Nunaanni najugalittut inuit nalunaarsorsimaffiannut ukiuni qaangiuttuni marlunni imaluunniit ukiuni kingullerni qulini ukiuni marlunni ataavartumik nalunaarsorneqareersimasunut taamaallaat tunniunneqarsinnaanerat pillugu piumasaqaat atuutinneqarpoq.

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 50 00, e-mail: amalie@nanoq.gl

Ilanngussaq