Kulturimut tunngasunik suliaqarnermut aningaasaliissutigisartagaannik qinnuteqaateqartarnernut piffissaliussaannik allanngortitsineq

Namminersorlutik Oqartussat kulturimut tunngasunik suliaqarnermut aningaasaliissutigisartagaannik qinnuteqaateqartarnernut piffissaliussaannik allanngortitsineq

Namminersorlutik Oqartussat kulturimut tunngasunik suliaqarnermut aningaasaliissutigisartagaannik siullermeerluni qinnuteqaateqartarnermut killiliussaq 1. februarimiit 15. januarimut allanngortinneqarpoq.

 

Eqqumiitsuliortunit arlalinnit suliaqarnermut aningaasaliissutigineqartartunik siullermeertumik qinnuteqarnermut killissarititaasup allanngortinneqarnissaa qangalili kissaatigineqartarpoq. Ilinniartitaanermut, Kultureqarnermut Ilageeqarnermullu Naalakkersuisoq Ane Lone Bagger isumaqarpoq qinnuteqaateqarnissamut killiliussaq allanngortinneqarpat eqqumiitsuliortut pilersaarusiukkanik suliaqartut iluaquserneqassasut nangillunilu: ”Allanngortitsisoqanngikkallarmat kulturimut tunngasunik suliaqarnermut aningaasaliissutit siulliit Namminersorlutik Oqartussat kulturimut aningaasaliissutaannut allanut ilanngullugit, ulloq 1. februar qinnuteqaateqarnissamut killiliussap kingornatigut, agguaattaraluarpagut. Taamaakkaluartoq arlalinnik saaffigineqartarpugut kulturimut tunngasunik suliaqarnermut aningaasaliissutigineqartartunik siullermeerluni agguaassisarnerup eqqumiitsuliortut ukiumi siusissukkut pilersaarutiminnik suliaqartut iluaqusertassagai. Soorunalimi tamanna tusaatissatut tiguarput aalajangiillutalu siullermeerluni qinnuteqaateqarnermut killissarititaasoq allanngortinniarlugu. Maannakkut eqqumiitsuliortunut ajornarunnaassaaq kulturimut tunngasunik suliaqarnermut aningaasaliissutit siulliit januaarip naanerani tigusalissallugit taakkuninngalu sulinerat siusinaartumik matussusertarlugu.”

 

Kulturimut tunngasunik suliaqarnermut aningaasaliissutinik siullermeerluni qinnuteqaateqartarnermut killiliussanik allanngortitsinerup saniatigut ukiukkaartumik qinnuteqaateqarnissamut killiliussat allat taamaaginnassapput, tassa 1. maj aamma 1. september.

 

Namminersorlutik Oqartussanit kultureqarnermut aningaasaliissutit allat tassaapput Kultureqarnermut aningaasaliissutit, Filmiliorneq kiisalu kalaallit oqaasii atorlugit atuakkiat imatut qinnuteqaateqarnermut killiligaasut, 1. februar, 1. maj aamma 1. september.

 

Kulturimut tunngasunik suliaqarnermut aningaasaliissutit taamatullu tapiissutaasartut allat pillugit paasissutissat uani atuarneqarsinnaapput www sullissivik gl

 

Namminersorlutik Oqartussat kulturimut tunngasunik suliaqarnermut aningaasaliissutigisartagaat paasisaqarfiginerorusukkukkit attaveqarfigissavat:

 

Ilinniartitaanermut, Kultureqarnermut Ilageeqarnermullu Naalakkersuisoqarfik

 

Uiloq Mathæussen

Toqq/direkte 345741

uilm@nanoq.gl

 

imaluunniit

 

Mika Lyberth

Toqq/direkte 345744

mlyb@nanoq gl