Ane Lone Bagger EU-p nunanut allanut Allattaanerata Tullersortaa aammalu Danmarkip NATO-mut aallartitaa ataatsimeeqatigai

Naalakkersuisoq Ane Lone Bagger EU-p nunanut allanut Allattaanerata Tullersortaa Christian Leffler marlunngornermi decemberip ulluisa 17-ani Bruxellesimi ataatsimeeqatigaa. Leffler EU-p nunanut allanut tunngassutilinni suliaqarfiani EEAS-imi EU-p Issittoq pillugu politikkianut atorfilittanut akisussaasuunerpaavoq. Ataatsimiinnermi Lefflerip ilaatigut peqatigaa maannakkut EU-p issittoq pillugu suliassaqarfinnut Aallartitaq Lars-Gunnar Vigemark.

Ataatsimiinnermi Kalaallit Nunaata EU-llu Issittumi soqutigisaat oqaluuserineqarput. Leffler naqissuserpaa nunarsuarmioqatigiinnit Kalaallit Nunaata annertuumik soqutigineqarnera, Kalaallit Nunaannillu illugiilluni suleqateqarnerup inerisarnissaa EU-mit soqutigineqarluartoq erseqqissaatigalugu. Lefflerip nuannaarutigaa Ane Lonep finskit nunat tamalaanut suleqateqarnermik Europa-Kommissærertaavanik Jutta Urpilainenimik, Nunat Imarpiup illuatungaaniittut Nunasiaataasimasullu (OLT) EU-mut Kalaallit Nunaannullu EU-mi akisussaaffeqartumik ingerlalluartumik ataatsimeeqatiginnissimanera.

Ilinniartitaanermut, Kultureqarnermut, Ilageeqarnermut Nunanullu allanut Naalakkersuisoq ima oqaaseqarpoq:

”EU-p Nunanut allanut Suliaqarfianeersup Christian Lefflerip ataatsimeeqatiginera pitsaavoq. Leffler EU-p issittumi politikkiata ilusilersornerani annertuumik sunniuteqartuuvoq, uppernarsarpaalu ullumikkornit annertunerusumik EU-p Issittumi Kalaallit Nunaannilu ersarinnerunissaa naatsorsuutigisinnaagipput. Tamanna EU-p siunertaanut nutaamut, tassalu nunarsuarmioqatigiinni sumiiffinni politikkikkut peqataanerulernissaanik siunniussaqarnermut naapertuuppoq. Siunissami EU-p Kalaallit Nunaanni suliaqarnissaannut tunngasumik uppernarsarpaa EU-p iluani aallarniutaasumik eqqarsaatersortoqartoq Kalaallit Nunaanni EU-allaffimmik ammaasinnaaneq, tassuunakkut EU-Kalaallit Nunaata suleqatigiinnerannik nukittorsaasoqassammat. Tamannalu soorunami Naalakkersuisunit tikilluaqquarput.”

Taassuma saniatigut Ane Lone Baggerip pilersaarutaani pingasunngornermi decemberip 18-ani pingaarutilimmik allamik ataatsimeeqateqarpoq, tassanilu Danmarkip NATO-mut Ambassadøria Liselotte Plesner ilassineqarpoq. Ataatsimiinnermi tassani siunertarineqarpoq Kalaallit Nunaata, Issittoq pillugu NATO-mullu tunngasut apeqqutit illugiilluni paasissutisseeqatigiinneq. Ataatsimiinneq Bruxellesimi NATO-p qullersaqarfittaavani ingerlanneqarpoq.

Ilinniartitaanermut, Kultureqarnermut, Ilageeqarnermut Nunanullu allanut Naalakkersuisoq ataatsimiinneq pillugu ima oqaaseqarpoq:

”NATO pillugu pisut kingulliit pillugit paasissutissinneqartarneq uagutsinnut pingaaruteqartuaannarpoq, Kalaallit Nunaat Kunngeqarfik Danmarkip ilaasortaaneratigut ilaavoq, NATO-milu aallartitat Kalaallit Nunaanni ineriartornernut attuumassutilinnut ilisimasaqarnissaat pingaaruteqarportaaq.”


Annertunerusumik paasissutissanik perusukkussi attaveqarfigisinnaavarsi: Mininnguaq Kleist, mail: mikl@nanoq.gl, mobil: +32 499 99 98 58